Nis projekti për vaksinimin e kafshëve të egra

nga Li12i-GG ARMY Sat 27 Feb 2010 - 0:02

Prishtinë, 27 shkurt — Bashkimi Evropian ka financuar projektin për kontrollin dhe zhdukjen e sëmundjeve të shtazëve të egra, përkatësisht tërbimin dhe murtajën klasike të derrit, projekt ky që do të kushtojë 1,5 milionë euro. Këto mjete i janë dhënë Agjencisë së Veterinës dhe të Ushqimit të Kosovës (AVUK) si zbatues i projektit, ndërkaq, ndonëse përgatitjet kanë filluar qe një muaj, projekti ka nisur së zbatuari që nga dita e enjte dhe do të zgjasë 24 muaj.
Synim i këtij projekti është ndalimi i dy sëmundjeve të kafshëve të egra nga bartja prej tyre tek njerëzit dhe kafshët shtëpiake. Zyrtarë të Agjencisë së Veterinës dhe të Ushqimit kanë thënë se pikërisht sëmundjet e tërbimit dhe etheve vijnë nga kafshët e egra, ndërkaq, vaksinimi dhe ekzaminimi i tyre përmes këtij projekti do të pamundësojë një gjë të tillë.
“Tërbimi është sëmundje e cila përhapet te njerëzit”, ka thënë Bahtir Murati, shef i sektorit të shëndetësisë në Agjencinë e Veterinës dhe të Ushqimit.
Përveç ndihmës për të ulur rreziqet shëndetësore për njerëzit dhe kafshët, ky projekt po ashtu do të përmirësojë kontrollin veterinar të tregtisë me kafshë të gjalla dhe produktet e tyre në Kosovë.
Vaksinimi i kafshëve të egra do të bëhet parmes ajrit, apo në mënyrë orale, ndërkaq, për këtë do të përdoren edhe aeroplanë apo helikopterë, sikurse në vendet e rajonit.
“Njëherë do të bëhet marrja e mostrave dhe më pas do të bëhet vaksinimi përmes ajrit”, ka thënë Murati.