Historia e Mësonjëtores së Parë Shqipe në 120 fotografi

Historinë e Mësonjëtores së Parë Shqipe e ka dokumentuar me 120 fotografi. Studiuesi e koleksionisti Niko Kotheria ka përzgjedhur datën shtatë mars për të promovuar albumin fotografik “Mësonjëtorja e Parë Shqipe 1887-2012”.

Fotografitë që dokumentojnë historinë e institucionit më të rëndësishëm arsimor janë përmbledhur në një album fotografik që është prezantuar për herë të parë në Korçë, në 125-vjetorin e hapjes së Mësonjëtores së Parë Shqipe. Shumica prej fotografive janë parë për herë të parë në publik, raporton gazeta “Shekulli”.

Në to shihen drejtues dhe mësuesit patriotë, nxënësit e Shkollës së Parë, të cilët u bënë veprimtarë të Lëvizjes për Çlirimin Kombëtar e deri te ata që ndihmuan me mjete ekonomike për hapjen e shkollës. Shumica e fotografive janë nxjerrë nga origjinalet e tyre ose nga procesi i zhvillimit të negativëve qindravjeçarë në metal, xham e pelikulë.

“Duke ndier mungesën e një vëllimi ku do të përfshihej me dokumente pamore gjithë historia e Mësonjëtores së Parë Shqipe, u pa i nevojshëm realizimi i këtij albumi. Aty paraqiten pothuajse të gjitha personazhet që kontribuuan për çeljen e kësaj foleje kombëtare”, ka thënë autori i këtij albumi, Niko Kotheria. Sipas tij, albumi trajton një nga ngjarjet më kryesore të luftës për pavarësi, kulturë e dije në vitet e Rilindjes Kombëtare, udhëheqës i së cilës ishte Naum Veqilharxhi.

“Çelja e Mësonjëtores së Parë Shqipe ishte një nga arritjet e mëdha të rilindësve e patriotëve tanë brenda e jashtë atdheut, rezultat i përpjekjeve dhe i luftës së kolonive patriotike në Rumani, Egjipt, Bullgari, Turqi”, ka thënë ai. Mësonjëtorja ishte e para shkollë shqipe laike dhe demokratike, ku të gjitha mësimet jepeshin në gjuhën shqipe. Ajo funksionoi mbi bazën e një programi me karakter të theksuar kombëtar, ku u mëkua dashuria për vendin, zakonet e gjuhën. Personeli arsimor i Shkollës së Korçës hodhi bazat e një shoqërie moderne perëndimore, pasi mësuesit që dhanë mësim aty përfunduan studimet dhe u diplomuan në universitete të rëndësishëm të Evropës.

Krahas promovimit të albumit fotografik, në Muzeun Kombëtar të Arsimit, është hapur ekspozita me të njëjtin titull, me eksponate dhe relikte origjinale nga Shkolla e Parë Shqipe e vitit 1887, edhe kjo e organizuar nga Niko Kotherja.

Nuk ka me mire sesa te flasesh per te tilla gjera.