Kosova nga vend tranziti, në vend konsumimi të narkotikëve

Me rastin e Ditës ndërkombëtare kundër drogave të premten në Prishtinë u tha se Kosova nga një vend tranzit i transportimit të drogës, është bërë vend i konsumimit të narkotikëve, ndërkaq konsumimi i substancave narkotike është në rritje në hapësirat e shkollave të mesme dhe atyre fillore, me fokus të veçantë në shkollat e kryeqytetit.Kryeministri i Qeverisë së Kosovës, Hashim Thaçi theksoi se problemi i përdorimit të drogës, i cili me të drejtë konsiderohet si një problem global, kërkon qasje dhe koordinim të përbashkët në luftimin e kësaj dukurie shumë rrezikshme për njerëzimin.
“Unë e çmoj bashkëpunimin e mirë të institucioneve tona vendore dhe atyre ndërkombëtare, si dhe kontributin e çmuar të organizatave joqeveritare. Rezultat i këtij bashkëpunimi është edhe aprovimi i Strategjisë nacionale dhe i Planit të veprimit kundër drogave”, theksoi Thaçi.
Ndërsa, ministri i Punëve të Brendshme, Bajram Rexhepi theksoi se luftimi i krimit të organizuar në të gjitha format e tij është prioritet i ministrisë që ai drejton.
“Kosova vazhdimisht ka qenë vend tranzit i trafikimit të narkotikëve, mirëpo kohëve të fundit kemi edhe raste të kultivimit të drogave, konkretisht të kanabisit. Konsumimi i drogës në Kosovë është një fenomen, i cili është në rritje e sipër. Kosova nga një vend tranzit i transportimit të drogës, është bërë vend i konsumimit të narkotikëve”, theksoi Rexhepi.
Ai tha se konsumimi i substancave narkotike është në rritje në hapësirat e shkollave të mesme dhe atyre fillore, me fokus të veçantë në shkollat e kryeqytetit, kryesisht të rinj të moshës nga 15 deri në 35 vjeç, ndërsa dominon gjinia mashkullore.
Ministri i Punëve të Brendshme theksoi se Policia e Kosovës ka qenë mjaft aktive në luftën kundër trafikimit me narkotik, por në disa raste ka munguar bashkërendimi i aktiviteteve ndërinstitucionale ndaj kësaj dukurie negative, e cila ka vështirësuar punën e Policisë së Kosovës, por edhe të agjencive të tjera të zbatimit të ligjit.