Bale mposht Stoke Cityn

nga **Binni** Sat 21 Aug 2010 - 6:05

Tottenham edhe pse me vështirësi, ka arritur të shënojë fitoren e parë në dy ndeshje këtë sezon, pasi arriti të mposhtë në udhëtim Stoke Cityn me rezultat 2-1, falë dy golave të Gareth Bale.

Të zgjedhurit e trajnerit Harry Redknapp kaluan në epërsi në minutën e 20-të të takimit, kur pas një loje të mirë të Aaron Lennon, Gareth Bale gjeti portën e portierit kundërshtar Ryan Shawcross.

Megjithatë, gëzimi i ekipit mysafir nuk zgjati shumë, pasi pesë minuta më vonë lojtarët e Stoke City arritën të barazojnë rezultatin me anë të Ricardo Fuller i cili shënoi pas një harkimi nga këndi.

Por pas po aq minutash, dyshja Lennon – Bale përsëri bënë një bashkëveprim të shkëlqyeshëm, që i mundësoi mbrojtësit anglez të shënojë edhe golin e dytë që i riktheu avantazhin Tottenhamit (30’).

Ndeshja pati një përfundim dramatik pasi në minutën e fundit goditja e debutuesit Jonathan Walters u pastrua nga Peter Crouch, e që u pa se kishte qenë prej përtej vijës së golit.

Fitorja është e para në dy ndeshje të Ligës Premier për Tottenhamin, pas barazimit pa gola në ndeshjen e kaluar ndaj Manchester Cityt. Tottenhami po ashtu u mposht me rezultat 3-2 nga zviceranët e Young Boys në ndeshjen e vlefshme për kualifikim në fazën e grupeve të Ligës së Kampionëve.