Tiranë, ekstradohet i dënuari për vrasje

nga **Binni** Fri 26 Aug 2011 - 8:59

Interpol Tirana ekstradoi mesditën e të premtes nga Roma një 37 vjeçar nga Rrogozhina, i dënuar nga drejtësia shqiptare për një vrasje të kryer 15 vjet më parë.
Burime zyrtare nga Policia e Shtetit thanë se në shtator të vitit 2001, nën akuzën e “Vrasjes me dashje”, 37 vjeçari, Arben Memolla, është dënuar nga Gjykata e Kavajës me 15 vjet heqje lirie.
Mësohet se në gusht të vitit 1996, shtetasi Memolla, në bashkëpunim edhe me tre të tjerë, ka vrarë me armë zjarri në rrugën nacionale Rrogozhinë-Peqin, shtetasin Mustafa Muça, si dhe ka plagosur djalin e tij, raportoi BW.
Në aeroportin “Nënë Tereza” në Rinas, i ekstraduari Memolla iu dorëzua përfaqësuesve të Drejtorisë së Përgjithshme të Burgjeve, ku do të vuajë dënimin e dhënë më parë nga drejtësia shqiptare.