TKOB, Arie nga Opera e parë shqiptare dhe dokumenti i parë i muzikës shqipe

Tiranë – Solistët e TKOB-së, nën dirigjimin orkestral të Zhani Cikos, do të interpretojnë nesër në skenën e këtij teatri, vepra të kompozuara nga autorë shqiptarë në shekullin e XIX-të, disa prej të cilave ekzekutohen për herë të parë.

Pas kërkimesh në arkiva, Zhani Ciko ka përzgjedhur në koncertin “Pena e muziktarëve rilindas” vepra që prej vitit 1881 e deri në vitet 1940, të kompozuara nga Palok Kurti, Fan Noli, Lec Kurti, Martin Gjoka, Thoma Nasi, Murat Shehu, Mikel Koliqi, Prenk Jakova dhe Kristo Kono.

Ndër interpretimet që e bëjnë të veçantë këtë mbrëmje do të jetë ai i aries nga opera e parë shqiptare, “Arbëreshët” e shkruar nga Lec Kurti në vitin 1915, për të cilën nuk dihet nëse është ekzekutuar ndonjëherë më parë. Aries do t’i japë zë sopranoja Shpresa Beka, e cila do të interpretojë monologun dramatik të veprës. “Nga opera “Arbëreshët”, kanë mbetur vetëm 11 fashikuj nga akti i parë. Nuk e kemi të plotë operën, por mund të them se nga aq sa kemi kuptohet se është një vepër patriotike nga konteksti, ku përmendet Skënderbeu”, është shprehur Ciko.

E nëse opera e parë shqiptare daton në vitin 1915, dokumenti i parë i muzikës shqiptare daton më herët, në vitin 1881. “Bashkimi i Shqipërisë”, e Palok Kurtit, një vepër që nuk është ekzekutuar asnjëherë, do të interpretohet nesër në TKOB.

Për herë të parë gjithashtu do të interpretohet edhe “Shqiptarja e gjydetnueme”, “Kenkan mbush malet me dëborë” nga Martin Gjoka apo një kompozim i Prenk Jakovës që solli edhe burgimin e tij. Një zbulim mes arkivave për kompozimet e para shqiptare është edhe një pjesë e Frano Ndojës, muzikë për dramën e Mihal Gramenos “Vdekja e Pirros”.

Koncerti do të interpretohet nga solistët Irini Nikolla, Ylber Gjini, Vikena Kamenica, Sonila Baboçi, Shpresa Beka, Eriona Gjyzeli, Irida Dragoti, Denis Skura dhe Solen Alla. “Pena e muziktarëve rilindas” do të vihet në skenë, nesër, ora 19:00, në kuadër të 100 vjetorit të Pavarësisë.

tpakten nuk paska qen muzik rrep