Galatasaray kërkon Harbuzin

Presidenti i klubit turk Gençlerbirligi, Ilhan Cavcav ka kërkuar tre milionë euro dëmshpërblim për mesfushorin kosovar Labinot Harbuzi që po kërkohet nga Galatasaray. Lajmi është bërë i ditur të shtunën nga gazeta turke "Fanatik".
Sipas kësaj gazete, Cavcav është i njohur me politikën e tij "blej lirë e shit shtrenjtë" dhe njësoj mund të veprojë qysh në afatin e janarit edhe me kosovarin.
Gençlerbirligi dhe Galatasaray vazhdojnë të negociojnë për të gjetur një zgjidhje rreth transferimit të Harbuzit 23-vjeçar te Galatasaray, që drejtohet nga trajneri holandez Frank Rijkaard.
Në fakt, Rijkaard qysh para transferimit të Harbuzit në Gençlerbirligi ishte interesuar ta sjellë atë.
Harbuzi te Gençlerbirligi u transferua në fund të muajit gusht për një dëmshpërblim prej 750 mijë eurosh. Me këtë skuadër firmosi kontratë deri në qershorin e vitit 2012, ndërsa gjatë pjesës vjeshtore regjistroi 12 ndeshje dhe dy gola në Superligën turke.
Tutje, gazeta "Fanatik" shkruan se Galatasaray është i gatshëm të japë katër lojtarë për Harbuzin në vend të tre milionë eurove, sa kërkon Gençlerbirligi.
"Kërkesa prej tre milionë eurosh për Harbuzin konsiderohet shumë e lartë nga presidenti i Galatasarayt Adnan Polat, i cili ka kërkuar të gjendet një zgjidhje tjetër", shkruan "Fanatik". "Ai në vend të tre milionë eurove ka ofruar katër futbollistë të rinj për shkëmbim me Harbuzin. Megjithatë negociatat mes dy skuadrave janë në vazhdim e sipër".
Aktualisht Gençlerbirligi është në pozitën e shtatë me 26 pikë, ndërsa Galatasaray zë vendin e dytë me 36 sosh. Renditjen e kryeson rivali i përjetshëm i Galatasarayt, Fenerbahçe me 37 pikë.