Vëllaznimi e Kosova befasuan për të keq

Dy skuadrat që kanë mbyllur pjesën vjeshtore në pozitat e fundit të Raiffeisen Superligës, Vëllaznimi dhe Kosova e Vushtrrisë kanë befasuar, por jo për të mirë. Kështu kanë vlerësuar të shtunën trajnerët Rafet Prekazi e Fahrudin Duraku, që aktualisht janë pa angazhim.
Si Prekazi ashtu edhe Duraku para fillimit të këtij edicioni kanë pritur më shumë nga Vëllaznimi dhe Kosova pasi, sipas tyre, kanë lojtarë cilësorë në skuadër. Vëllaznimi dhe Kosova kanë tubuar nga 14 pikë për 17 javë të zhvilluara. Prekazi thotë se Vëllaznimi ka një traditë dhe gjithashtu në fillim synimet e tyre nuk ishin fundi i tabelës, por kreu i saj.
"Vëllaznimi ka dështuar më së shumti nga të gjitha skuadrat e Superligës. Gjatë pjesës vjeshtore i kam përcjellë dhe jo vetëm që kanë pasur lojë të mirë, por edhe ekip. Ata kanë një traditë dhe kam pritur që vjeshtën ta mbyllin në pjesën e epërme të tabelës", ka thënë Prekazi. "Edhe Kosova është dashur të ketë më shumë pikë dhe jo të jetë e fundit në tabelë. Këtë e them, pasi kanë një ekip që tashmë disa vite luan së bashku. Jam befasuar vetëm nga këto dy skuadra, kam pritur më shumë".
Kampionia aktuale, Prishtina ka pasur një nga startet më të dobëta në histori të saj, por kjo nuk e ka befasuar Prekazin, e as Durakun.
"Më së shumti më ka befasuar Kosova, sepse unë isha aty në edicionin e shkuar dhe përfunduam në pozitën e pestë. Është plotësisht ekipi i njëjtë që ishte edhe nën drejtimin tim. Nuk i di arsyet e këtij dështimi, por personalisht kam pritur më shumë", tha Duraku. "Edhe Vëllaznimi nuk ka bërë atë që është pritur. Ka ekip të mirë, por si duket duhet të marrin shembull nga ekipet e tjera. Të dy skuadrat kanë traditë dhe në çdo ndeshje shënojnë shikueshmërinë më të madhe".