7 klube duan disenjator të ri arbitrash, 5 refuzojnë

Dhjetë klube të Superiores pranojnë mbledhjen e presidentëve dhe paketën Kokëdhima. Kastrioti e Laçi refuzojnë

Mbledhja e fundvitit e shumicës së presidentëve të klubeve, ok paraprak i presidentit Duka për të lëshuar një shteg mëvetësie në drejtim të tyre, në aspektin e vetëvendosjes së rregullave, ka çuar në reflektimin e thellë të atyre që mbajnë Superioren, për të hedhur një hap.

Nisma lindi nga një lëvizje blic e fillim - dhjetorit e Kokëdhimës, presidentit të nderit të Apolonisë, i cili paraqiti në FSHF, në Komitet dhe të klubet e Superiores, paketën e ndryshimeve, ku spikaste edhe aneksi për të marrë vendime vetë në lidhje me atë që mund të quhet auto - drejtim të kompeticionit.

Vetë numri 1 i FSHF-së u la klubeve të Superiores edhe të drejtën e caktimit nga vetë ata të Disenjatorit të ri të arbitrave, duke u servirur pikërisht ofertën që të gjejnë ata një emër, ta sjellin në FSHF, duke shmangur në vijim kostot e shumta që mbart shpesh FSHF-ja, dhe mbi të gjitha Garat, nga gabimet arbitrare në fushë.

Të gjithë u pyetën për këtë lëvizje, mirëpritën paketën, por duke dëgjuar edhe alternativat respektive. Laçi dhe Kastrioti ishin dy klubet e Superiores që refuzuan kategorikisht, teksa pjesa tjetër shprehu buonsens, në një kohë parashtroi edhe kritere që duhen të merren parasysh.

Klube si Apolonia, Teuta, Besa, Vllaznia, Dinamo, Gramozi, Shkumbini shprehën vullnet të plotë në krijimin e Ligës, të krijimit të mbledhjes së presidentëve si një mini - strukturë për të marrë vendime, si dhe për ndryshimin e shpejtë atë të gjetjes së një tjetër disenjatori. Artific, të cilin Duka ua ka pranuar dhe pret emrin e ri, por pret votën dhe mendimi prej të gjithëve.

Por, paketa Kokëdhima ka shumë më tepër se disenjatori ri. Laçi pranon largimin e disenjatorit aktual, por me kushtin drastik, që atë të vendosë sërish FSHF-ja dhe jo klubet, dy, tre, katër, apo nismëtarët konkretë.

Dinamo gjithashtu kërkon kritere, por nuk shfaq kundërshti, teksa Halili i Tiranës shkon më gjatë teksa mendon se nuk është problem heqja e Kotheres, por ngritja e Ligës, e pavarur tërësisht nga FSHF-ja. Duka ndërkaq është ende në pritje të perceptimit, se sa buonsens do të arrijnë klubet, pasi do të jetë një tregues madhor për të.

PRO dhe KUNDËR

TIRANA Pro krijimit të Ligës, kundër ndërrimit të disenjatorit
DINAMO Pro paketës dhe disenjatorit të ri, por me kushte
TEUTA Pro paketës dhe disenjatorit të ri
VLLAZNIA Pro paketës dhe disenjatorit të ri
BESA Pro paketës dhe disenjatorit të ri
FLAMURTARI Pro mbledhjes së klubeve, kundër disenjatorit të ri
SHKUMBINI Pro paketës dhe disenjatorit të ri
APOLONIA Iniciues e paketës. PRO
GRAMOZI Pro paketës dhe disenjatorit të ri
LAÇI Kundër paketës dhe disenjatorit të ri
KASTRIOTI Kundër paketës dhe disenjatorit të ri
SKËNDERBEU Kundër disenjatorit të ri, në mes të sezonit