Topalli kërkon nga Egjipti të njohë Kosovën

nga **Binni** Sat 20 Feb 2010 - 9:26

Kryetarja e Kuvendit të Shqipërisë, Jozefina Topalli ka zhvilluar një takim zyrtar me kryetarin i Asamblesë Popullore të Egjiptit, Fathy Souror, nga i cili ka kërkuar që ky shtet të njohë pavarësinë e Kosovës. Kryetari i Komisionit të Jashtëm të Parlamentit të Egjiptit, i pranishëm në takim, siguroi Topallin se ky komision do t’i rekomandojë Qeverisë së Egjiptit njohjen e shtetit të Kosovës, pasi - siç u shpreh ai - edhe opinioni publik është në favor.
Dy kryeparlamentarët vlerësuan se bashkëpunimi mes parlamenteve të të dy vendeve, me lidhje historike dhe miqësore, është shumë i rëndësishëm, por ai duhet forcuar në aspektin ekonomik, në shkëmbimet tregtare dhe në të gjitha fushat me interes të përbashkët.
Dy homologët u ndalën edhe në çështjen e Kosovës. Topalli, duke vlerësuar ndihmën e dhënë nga Egjipti gjatë luftës në Kosovë, tha se ne e konsiderojmë Egjiptin si një vend lider të botës arabe, që me influencën e tij do të ndikonte mjaft në njohjen e shtetit të Kosovës. “Ky realitet i ri, tha Topalli, ka ndikuar në stabilitetin e rajonit tonë, duke çuar përpara fqinjësinë e mirë, pas njohjes së Kosovës nga të gjitha vendet e ish-Jugosllavisë, përveç Serbisë”.
Kryetari i Komisionit të Jashtëm të Parlamentit të Egjiptit, i pranishëm në takim, siguroi Topallin se ky komision do t’i rekomandojë Qeverisë së Egjiptit njohjen e shtetit të Kosovës, pasi edhe opinioni publik është në favor.
Në nderim të vizitës së Topallit, kryetari i Parlamentit egjiptian kishte përgatitur posaçërisht për të një medalje të artë, ku ishte gdhendur emri i saj, gjë që sipas tij do t’ia bënte kryetares së Kuvendit të Shqipërisë të paharrueshme vizitën e saj të parë në Egjipt.
Topalli në Kajro ka mbajtur fjalimin kryesor në konferencën e Mesdheut për rolin e gruas. Kjo konferencë, që ka për qëllim rritjen e rolit të gruas në vendimmarrje, është një nga prioritetet e Unionit për Mesdheun, organizëm i cili bashkëkryesohet nga presidenti i Francës, Nicolas Sarcozy dhe nga presidenti i Egjiptit, Hosni Mubarak.