Sejdiu e Haradinaj diskutojnë për gjendjen aktuale në Kosovë

Presidenti i Republikës së Kosovës, Fatmir Sejdiu ka pritur të martën kryetarin e Aleancës për Ardhmërinë e Kosovës, Ramush Haradinaj, me të cilin ka biseduar për gjendjen aktuale në Kosovë, ndërsa vëmendje iu kushtua nevojës së shtimit të efikasitetit të punës së pozitës dhe të opozitës, për të mirën e qytetarëve dhe të vendit.
Po kështu, siç thuhet në një komunikatë të Presidencës, u bisedua edhe për zgjedhjet, si dhe nevojën e veprimeve që do të ndikonin në mënjanimin e disa dobësive që janë paraqitur në zgjedhjet e fundit lokale.
U shtrua gjithashtu edhe nevoja e bashkëpunimit të të gjithë faktorëve politikë, që të mënjanohen dobësitë e shprehura në fusha të ndryshme, të cilat ngadalësojnë zhvillimin e vendit dhe ndikojnë në jetën e qytetarëve.
Takimi i presidentit Sejdiu me liderin e AAK-së u zhvillua në kuadër të diskutimeve të vazhdueshme që presidenti ka me liderët e partive politike, theksohet në komunikatën e Presidencës.