PS nesër në Kuvend

Pas 6 muajsh mungesë në Kuvend, deputetet socialiste do të rikthehen pasditen e nesërme në sallën e Kuvendit. Deklarata erdhi nga kreu socialist Edi Rama pak përpara se të zhvillohej mbledhja e grupit parlamentar të Partisë Socialiste.
“Nesër ne do të jemi në Parlament, por jo për të ndenjur pa u hapur kutitë”, theksoi kryesocialisti ndërsa tha se vendimi i opozitës për të njohur rezultatin e zgjedhjeve tregon qartë se opozita ka dhënë sinjalin për zgjidhjen e krizës.
“Nuk e kemi përjashtuar dhe as e përjashtojmë dialogun si instrument për të zgjidhur krizën, madje kemi qenë ne që kemi dhënë sinjalin e kompromisit në të mirë të të ardhmes së vendit duke njohur rezultatin e zgjedhjeve. Nuk duam rinumërim për të ndryshuar rezultatin, nuk duam fitore në tavolinë, por transparencën e plotë të zgjedhjeve”, theksoi Rama
Kreu socialist zyrtarizoi faktin se nga ky moment deputetët socialistë do të thyejnë bojkotin për të hapur kutitë e votimit.
“Ne nesër do ti japim një zgjidhje të qartë krizës, kemi gati çelësin e kthimit të opozitës në Parlament, por i takon mazhorancës, të vendosë nëse e do apo jo opozitën në Parlament”, u shpreh kryesocialisti.
Ndërkaq Rama shtoi se në rast se në parlament nuk do të hetohen zgjedhjet atëherë, siç tha ai Marsi do të jetë muaji i ngritjes së popullit opozitar në protesta.
Në fund të mbledhjes së sotme do të ketë një deklaratë zyrtare, në lidhje me çfarë projekti do të shkojnë nesër deputetët socialistë në sallën e Kuvendit. /