Verdikti për Kosovën i GJND-së shtyhet deri në gusht

Gjykata Ndërkombëtare e Drejtësisë nuk pritet të japë mendimin këshillëdhënës lidhur me ligjshmërinë e shpalljes së pavarësisë së Kosovës deri në fund të gushtit.

Gjykata e Drejtësisë asnjëherë nuk është deklaruar zyrtarisht se kur do të përfundojë procesi rreth rastit të Kosovës, por është thënë se do të trajtohet me prioritet.

Mirëpo, zyrtarë të Kosovës, Serbisë dhe shteteve të tjera, fillimisht kanë përmendur prillin e më vonë qershorin, si afatin më të mundshëm të shpalljes së vendimit nga ana e Gjykatës.

Sipas gazetës "Express", nga qarqe të njëjta paralajmërohet një shtyrje e re. "Sinjalet që vijnë nga Haga tregojnë se GJND-ja nuk mund të përfundojë punën deri në fund të gushtit", citohet të ketë thënë të mërkurën një diplomat perëndimor me kusht anonimiteti.