Patozi: PS po kthehet në diktaturë

Partia Socialiste po kthehet në kohët e errëta të diktaturës komuniste. Ky ishte qëndrimi që mbajti dje kryetari i grupit parlamentar të Partisë Demokratike, Astrit Patozi, në lidhje me Asamblenë e PS-së, e cila u zhvillua pak ditë më parë.

Sipas tij, zhvillimet që ndodhën në këtë Asamble në veçanti dhe në PS gjatë kësaj kohe po e kthejnë partinë më të madhe të opozitës në të shkuarën e saj të errët.

“Zhvillimet që po ndodhin në PS janë një hap i madh regresi brenda kësaj partie. Po kthehen në kohërat më të errëta të komunizmit. Asambleja ishte një rikthim në origjinën e etërve të tyre”, vlerësoi Patozi për këtë mbledhje të PS-së.

Pak ditë më parë, PS-ja zhvilloi edhe Asamblenë e saj, në të cilën u thellua qëndrimi i bojkotit të kushtëzuar të Parlamentit dhe kryerja e protestave në çdo zonë të vendit për të arritur edhe hapjen e kutive të zgjedhjeve të shkuara.