Britania pasuron Bibliotekën e Gjakovës

Gjakovë, 9 nëntor - Ambasadori i Britanisë së Madhe në Kosovë, Ian Cliff, u ka premtuar udhëheqësve të bibliotekës së Gjakovës se vendi i tij do të vazhdojë të ketë interesim për këtë institucion, por beson se edhe British Council, e cila ka ndihmuar deri tash, po ashtu do të vazhdojë bashkëpunimin. Ai u tha zyrtarëve të bibliotekës, të cilët iu ankuan për mungesë të titujve në përgjithësi, se këso probleme kanë edhe kolegët në vendin e tij.

“Të gjithë jemi duke kaluar në restrikcione buxhetore, por është me rëndësi të pasurojmë bibliotekat me tituj të rinj dhe të ecim sipas kohës. Kjo është diçka që duhet të kemi parasysh së bashku”, ka thënë Cliff të martën paradite, në një vizitë që i ka bërë bibliotekës rajonale “Ibrahim Rugova” në Gjakovë, përkatësisht këndit të librave në gjuhën angleze.

Biblioteka e Gjakovës para dy vjetëve ka fituar gjithë fondin e bibliotekës së Britsh Council.

Drejtori i bibliotekës, Engjëll I. Berisha, i ka thënë ambasadorit Clif se dhurata e British Council po u hyn shumë në punë lexuesve anglishtfolës, që, sipas tij, janë të shumtë në Komunën e Gjakovës.

"Mirëpo këta libra po u shërbejnë edhe lexuesve të komunave të tjera rreth Gjakovës, që shfrytëzojnë këtë bibliotekë", ka thënë ai.