Mediat greke: Edi Rama fitore madhështore në Shqipëri

Fitorja e së majtës shqiptare në zgjedhjet e 23 Qershorit, ka bërë jehonë në mediat e huaja. Zgjedhjet ne Shqipëri dhe fitorja e koalicionit të majtë është në vëmendjen e thuajse të gjitha gazetave të mëdha greke, të cilat pasqyrojnë me tituj të ndryshëm këtë zhvillim. “Edi Rama udhëheq në zgjedhjet shqiptare. Vazhdon numërimi”, shkruan To Vima, duke e cilësuar si “dërrmuese” fitoren e së majtës, pa harruar të përmendë akuzën e Vangjel Dules për mashtrim të PS.  “Kathimerini” shkruan: “Rama fitues në Shqipëri, njolloset procesi zgjedhor. PBDNJ akuzon PS për mashtrime”. Sipas “Ta nea”, “Edi Rama ofron një fitore plebishitare”, ndërsa “Ethnos” e titullon shkrimin “Shqipëria kthen faqe me Edi Ramën”. “Brukseli ndjek nga afër procesin, nën peshën e shqetësimit për mashtrime. Zgjedhjet u njollosën nga incidenti i përgjakshëm në Laç, me të shtënat fatale ndaj një përfaqësuesi të partisë opozitare dhe plagosjen e një kandidati të PD”, shkruan “To vima” dhe citon raportin e OSBE-ODIHR, ku thuhet se procesi zgjedhor u prish nga vrasja dhe disa probleme teknike. Sipas gazetës “To Vima”, në këto zgjedhje duket se do të zgjidhen së paku 5 kandidatë me origjinë greke. Është karakteristike sipas gazetës, se edhe në zonat me popullsi të pastër të minoritetit grek, fitorja është siguruar kryesisht nga partitë e mëdha shqiptare. “Kathimerini” citon Ramën që deklaroi se "Fitorja do të jetë më e madhe sesa dukej" si dhe raportin paraprak të OSBE-ODHIR. Sipas gazetës, pas një numërimi të pjesshëm, Partia Socialiste duket të ketë zotërim të fortë edhe në bastionet e Partisë Demokratike. Citohet Vangjel Dule që flet për një masakër të vërtetë elektorale dhe jo për një incident të izoluar. "Fitore plebishitare ofron Edi Rama në zgjedhjet shqiptare”. Kështu shkruan gazeta “Ta nea”, që shton se ndërsa rezultatet zyrtare nuk priten para të martës, Rama është fitues ndaj Berishës. Gazeta përmend vrasjen në Laç dhe faktin që këto zgjedhje po monitorohen gjerësisht nga Evropa. -