Kosova dhe Serbia në BE si vende të pavarura

Ministri i Punëve të Jashtme i Francës, Bernard Kouchner, deklaroi sot në një seancë solemne të Kuvendit të Kosovës se një ditë Kosova dhe Serbia do të gjenden në rrugën e tyre drejt Bashkimit Evropian si dy vende të pavarura, andaj dialogu ndërmjet këtyre dy shteteve është kusht paraprak për këtë rrugë. Ai tha se pavarësisht vuajtjeve pajtimi mes Kosovës dhe Serbisë është i mundshëm.
"Pavarësia juaj nuk është në pyetje. Kjo është lëvizje e historisë. Asgjë dhe askush nuk mund ta parandaloj këtë lëvizje të historisë. Një ditë Kosova dhe Serbia do të gjenden në rrugën e tyre drejt Bashkimit Evropian si dy vende të pavarura", tha Kouchner.
Ai tha se reformat në drejtësi duhet të vazhdojnë, ndërsa kërkoi nga qytetarët që të kenë besim në drejtësinë e shtetit të tyre.
“Funksionarët e administratës duhet të jenë të pavarur nga politika. Tani duhet të krijoni një klimë besimi që qytetarëve t’u kthehet besimi. Duhet ta luftoni korrupsionin, duhet të vazhdohet me transparencë si dhe të realizohet privatizimi duke i garantuar të drejtat punëtorëve dhe investitorëve", shtoi Kouchner në fjalimin e tij para deputetëve të Kuvendit të Kosovës.