Racizmi, Meta: Vlerësoj ndjesën e ambasadës greke, ndëshkim autorëve

TIRANE – Ministri i Jashtëm i Shqipërisë Ilir Meta, vlerësoi sot deklaratën e ambasadorit grek në Tiranë i cili kërkoi falje publike për thirrjet antishqiptare të ushtarëve grekë gjatë një parade në Athinë më 25 mars, me rastin e Ditës së Pavarësisë në Greqi.
“Vlerësoj reagimin e ambasadës dhe shpreh bindjen se ky incident duhet të ndëshkohet në bazë të ligjeve”, ka thënë zv.kryeministri dhe Ministrii Jashtëm Ilir Meta.
Ora: 12:57
TIRANE – UPDATE- Pas reagimit të Zv.Kryeministrit dhe Ministrit të Punëve të Jashtme z.Ilir Meta në lidhje me incidentin e disa prej anëtarëve të forcave të armatosura greke të cilët kanë hedhur slogane fyese, ekstremiste dhe ksenofobe kundër shqiptarëve dhe popujve të tjerë fqinj, Ambasadori i Republikës së Greqisë z.Nikolaos Pazios, i ka konfirmuar z.Meta vendosmërinë e qeverisë greke për të dënuar skandalin dhe ndëshkimin e ashpër të autorëve. Ambasadori Pazios i ka shprehur z.Meta ndjesën e qeverisë greke për ç`ka ka ndodhur dhe e ka siguruar se autoritetet kompetente greke do t`i shkojnë hetimit të këtij incidenti deri në fund, duke ndëshkuar edhe autorët e tij.

Z.Meta pasi ka vlerësuar reagimin e menjëhershëm e të vendosur të qeverisë greke, ka theksuar se marrëdhëniet mes dy vendeve dhe popujve tanë do të vazhdojnë të përparojnë dhe të forcohen më tej.
27 March 2010 11:02
Thirrjet antishqiptare në Athinë, protesta në Tiranë: Greqia, turpi i BE

TIRANE – Filloi në ora 11:00 protesta para ambasadës greke në Tiranë. Qindra qytetarë i janë përgjigjur thirrjes së organizatave joqeveritare për tu mbledhur në protest para Ambasadës së Greqisë në Tiranë dhe për të ngritur zërin kundër thirrjeve, koreve e këngëve antishqiptare që u dëgjuan gjatë paradës së forcave speciale të ushtrisë greke në mes të Athinës.
“Greqia, TURPI i BE”, janë disa nga pankartat që mbajnë në duart protestuesit e mbledhur para ambasadës greke në Tiranë.