Fabregas në Barça, n’ mot

Mesfushori i Arsenalit, Cesc Fabregas vështirë se do ta veshë fanellën e
Barcelonas sezonin e ardhshëm, pavarësisht se këtë gjë ia kishin mundësuar
bashkëlojtarët e tij nga Kombëtarja spanjolle.

Presidenti i Barcelonas,
Sandro Rosell, ka pranuar se nuk do të jenë në gjendje ta transferojnë yllin e
Topxhinjve gjatë kësaj vere. Rosell thotë se aktualisht nuk janë në bisedime për
kapitenin e Arsenalit, i cili ishte pjesë e akademisë së katalunasve para se të
transferohej si 16 vjeçar në Londër.

"Arsenal ndihet i lënduar nga
Barça. Ata nuk dëshirojnë të dëgjojnë për ofertat dhe nuk janë duke e shitur
atë. Kemi pasur një polemikë para disa muajsh dhe ata nuk e kanë harruar atë”,
tha Rosell për televizionin katalunas TV3.

“Ai do të vijë, edhe nëse jo
tani, ai do të jetë këtu vitin e ardhshëm. Do të shohim. Një gjë është e sigurt,
se ne nuk do të harxhojmë shumë marramendëse për ta transferuar. Asnjë aksionar
nuk do të paguajë 60 apo 70 milionë euro për Fabregasin. Ne do të paguajmë vetëm
sa ai vlen”, tha Rosell. Fabregas ka kontratë me Arsenalin deri në verën e
2015’ës.