Në fund të Detit të Vdekur gjenden organizma të gjallë!

Një ekspeditë shkencëtarësh gjermanë kanë zbuluar në fund të Detit të Vdekur burime të ujit të ëmbël në të cilat ekzistojnë baktere të një lloji të panjohur.

Anëtari i ekipit hulumtues, mikrobiologu detar Deni Jonesku nga Instituti “Max Planck” në Gjermani, thotë se krateret e para janë gjetur vitin e kaluar.

“Secila nga hapjet janë gjetur në thellësi prej 30 metrash dhe janë të gjera rreth 10 metra, ndërsa thellësia arrin në rreth 13 metra. Krateret janë të mbuluara me filma të gjelbër të llojeve deri më tash të panjohura të baktereve, disa prej të cilave për befasi janë të trasha. Këto bashkësi të vogla jetojnë nga rryma e ujit të ëmbël që vjen nga nëntoka. Kur futni kokën në krater nuk shihni asgjë, por duhet të keni besim dhe dëshirë për hulumtim”, ka thënë ai.

Deti i Vdekur kryesisht është i pajetë. Dikur në këtë det kanë rrjedhë lumenj, në mesin e të cilëve edhe Jordani, por shteti jordanez në vitin 1950 ndërpreu rrjedhën e lumit drejt Detit të Vdekur, me qëllim që t’iu sigurojë banorëve sasi më të madhe të ujit të pijes. Për këtë arsye sasia e ujit çdo vit në këtë det bie për gati një metër. Në 40 vjetët e fundit ka rënë për 25 metra.

Me zhdukjen e ujit të ëmbël, Deti i Vdekur është bërë më i njelmët se sa oqeanet, duke ndikuar në zhdukjen e organizmave. Por, është shumë interesante që në këtë ujë, i cili ka plot magnez, të ketë jetë.

Ujërat e Detit të Vdekur janë shumë pak të hulumtuara, ndërsa ekspertët janë befasuar me daljen e algave në vitin 1980 dhe 1992. Por, këto alga duket se janë krijuar nga organizma krejtësisht të ndryshëm. Biologët supozojnë se bakteret në fund të detit mund të mbijetojnë falë dritës së diellit në sipërfaqe.

Jonesku thotë se organizmat e zbuluar janë veçanërisht interesant për shkak të adaptimit në ambiente të ujit të njelmët dhe atij të ëmbël.

“Deri më tash nuk është regjistruar ekzistimi i llojeve që mund të jetojnë në të dyja ambientet”, ka shpjeguar mikrobiologu.

Ekipi i Joneskut do të vazhdojë hulumtimet gjatë këtij muaji. Hulumtimi në Detin e Vdekur nuk është i lehtë dhe pa rreziqe, për shkak të ujit tepër të njelmët, i cili në rast se pihet nga njeriu mund të shkaktojë ndezjen e fytit dhe ngulfatje.

Deti i Vdekur, i cili ndonjëherë quhet edhe Deti i njelmët, në fakt është liqen sipërfaqja e të cilit ndodhet 423 metra nën lartësinë zero mbidetare dhe është rajoni më i ulët në sipërfaqen e Tokës, ka thellësi prej 377 metrave, ndërsa përqindja e kripës është 33,7 për qind, gjë që e bën ndër ujërat më të njelmëta në botë (8,6 herë më e njelmët se sa oqeani). Është vend i adhuruar turistik, pasi është i njohur për vetitë shëruese qysh nga kohërat biblike. (K.P)

teper e habitshme per te qen e vertete