Pep Guardiola bëhet gati për largimin

nga Emona Sat 18 Feb 2012 - 10:06

Pep Guardiola ka bërë të dridhet e gjithë tifozeria e Barcelonës duke deklaruar për herë të parë se rinovimi i tij me këtë skuadër nuk është i sigurt. Në konferencën për shtyp të fundjavës, trajneri i katalanasve ka thënë se i duhet më shumë kohë për t’u menduar nëse ia vlen apo jo të rinovojë me këtë skuadër.

“E kam thënë 20 herë deri tani, për mua do të ishte më e thjeshtë të rinovoja me një kontratë 5-vjeçare. Por kjo është çështje personale, nuk ka të bëjë me klubin, e kam thënë se askund nuk do të jem më mirë se sa këtu. Por unë duhet të ndjej nevojën për të rinovuar. Nuk mund të punoj në një klub kërkues nëse nuk i jam i bindur se jam i fortë sa duhet për të përballuar kërkesat”.

“Çdo herë që pyes veten, nuk mund të vendos, pasi nuk jam ende i qartë. Nëse klubi do të vendosë një afat atëherë do të ulemi të flasim dhe të vendosim atë që është për t’u vendosur por për momentin unë shqetësohem për atë që kam përpara, ndeshjet e kampionatit. Kemi qenë bashkë për 4 vjet dhe çdo vendim duhet menduar mirë. Nuk dua që të keqpërdor klubin apo të bëj diçka që nuk e ndjej. Do të më pëlqente të kisha më shumë kohë për t’u menduar. Nëse pranohet kjo kërkesë në rregull, nëse jo, s’kam çfarë t’i bëj”.

“Po e përsërit që nuk kam marrë asnjë vendim. Kur të vendos, të parët që do ta marrin vesh do të jenë drejtuesit e klubit. Nuk e di çfarë do të bëj. Nga dita në ditë unë jam në kërkim të një arsyeje për të vazhduar këtu”, tha ai.

Gjithsesi, Guardiola ka hedhur poshtë zërat se vendimi i tij kishte lidhje me mungesën në drekën e organizuar nga lojtarët dy ditë më parë. “Nuk shkova në drekë sepse nuk isha i uritur”, ishte batuta e Pep. “Kjo skuadër nuk ka nevojë që të organizojë dreka miqësore për të treguar që janë shokë me njëri me tjetrin. Ata kaluan një drekë bashkë sepse donin ta bënin një gjë të tillë dhe nuk u bë për reklamë. Në këto raste është gjithmonë më mirë të jesh vetëm dhe të mos e kesh mendjen të trajneri. Kjo është arseja pse unë nuk shkova”, përfundoi Guardiola. (LajmeShqip.com)