Synimi i Mancinit: pesë tituj e katër kupa të Anglisë

Synimi i Mancinit: pesë tituj e katër kupa të Anglisë



Italiani Roberto Mancini ka vetëm një javë që është emëruar në postin e trajnerit te Manchester Cityt dhe ende nuk ua ka mësuar të gjithë lojtarëve emrat, mirëpo kjo nuk e ka penguar të tregohet skajshmërisht ambicioz. Në një intervistë për "Sky Sport", ai ka thënë se në krye të klubit do të jetë të paktën 15 vjet dhe se gjatë kësaj kohe do të fitojë pesë tituj të Premier Leagues dhe katër Kupa të Anglisë.
"Shpresoj që kur të largohem nga klubi, të largohem me pesë tituj të ligës dhe katër kupa", ka thënë Mancini.
Mancini ka trashëguar në detyrën e trajnerit të Cityt Mark Hughesin, i cili u shkarkua për rezultate jo të mira.
Strategu italian Mancini me Interin ka fituar tre tituj të Serie A dhe dy kupa të Italisë për katër stinorë, sa e udhëhoqi këtë skuadër.
Në fakt, ai nuk u mirëprit nga futbollistët e Cityt. Ata ishin të pakënaqur me mënyrën se si u shkarkua trajneri Hughes.
"Këtë stinor do të synojmë të zëmë vend në katërshen e madhe. Stinorin e ardhshëm do të synojmë të jemi të parët në Premier League. Në Inter kam kryer punë të madhe. Kur u emërova si trajner Interi kishte 17 vjet pa fituar titull. Mirëpo, brenda vetëm një viti fituam Kupën e Italisë e më pas edhe titulline kampionit. Liga e e Anglisë është e vështirë. Mirëpo, nëse bëjmë punë të mirë brenda këtyre pesë-gjashtë muajve, atëherë mund të zëmë vendin e katërt e të kualifikohemi në Ligën e Kampionëve. Më pas mund të hidhemi në gjueti për tituj. Kur një ditë të largohem nga klubi, të themi pas 15 vjetëve, atëherë do të largohem me pesë tituj të Anglisë e me katër kupa. Futbollistët do të kenë respekt për mua atëherë", ka thënë Mancini.