Topi letër Krasniqit për 3 vjetorin e Pavarësisë së Kosovës

Presidenti Bamir Topi i shprehu urimet më të ngrohta, të sinqerta e vëllazërore popullit të Kosovës me rastin e tre vjetorit të shpalljes së Pavarësisë së Kosovës. Në përshëndetjen e kësaj date historike, Kryetari i Shtetit shqiptar, nëpërmjet një mesazhi drejtuar Presidentit në detyrë të Republikës së Kosovës, Jakup Krasniqit, theksoi se ndjehet i nderuar të urojë Kosovën dhe mbarë kombin shqiptar për Ditën e Pavarësisë së saj, ditë e cila përcaktoi në mënyrë përfundimtare fatin dhe perspektivën e qartë të Kosovës si një shtet i lirë, sovran, i pavarur dhe multietnik, me një të ardhme të konfiguruar qartë me vlerat dhe standardet euroatlantike. “Klasa politike dhe udhëheqësit politikë kosovarë dëshmuan në momente thelbësore për Kosovën se kanë mjetet praktike institucionale dhe ligjore për koordinimin dhe mbikëqyrjen e zbatimit të reformave kyçe dhe të politikave strategjike të shtetit. Në përpjekje për të strukturuar politikisht një pushtet të përgjegjshëm dhe kompetent, që di t’i përgjigjet më së miri nevojave të qytetarëve dhe t’u përgjigjet interesave kombëtare duke ofruar mënyra të vërteta demokratike, shteti i ri dhe populli i Kosovës duket se ia kanë dalë mbanë, duke ndërtuar në këto tre vite pavarësie atë, për të cilën shoqëritë vijojnë të përpiqen edhe sot: një shtet multietnik të bazuar mbi respektimin e të drejtave të të gjitha pakicave”, thuhet ndër të tjera në mesazhin e urimit të kreut të shtetit shqiptar drejtuar ushtruesit të detyrës së presidentit të Kosovës. Me këtë rast, presidenti Topi ka shprehur urimet më të mira për konstituimin sa më të shpejtë të institucioneve legjitime të Kosovës, të dala nga zgjedhjet e fundit të përgjithshme.