Uruguaji, çerekfinalisti i parë i Kampionatit botëror 2010

Uruguai është kombëtarja e parë e cila ka kaluar në çerekfinale të Kampionatit botëror, që po mbahet në Afrikën e Jugut. Uruguai të shtunën e eliminoi Korenë e Jugut në të tetën e finales së këtij Botërori, pasi e mposhti me rezultat 2:1.

Më meritori për këtë sukses që e arriti Uruguai ishte Luiz Suarez, i cili i realizoi të dy golat për kombëtaren e tij.

Pas një iniciative të lehtë në teren, Uruguai ia doli të kaloj në epërsi prej 1:0 në minutën e 8-të me golin që e realizoi Suarez, i cili morri një top nga Forlan, kur mbrojtja e jug-koreanëve nuk ishte duke funksionuar si duhet.

Pas këtij goli të pësuar, kombëtarja e shtetit aziatik filloi ta kërkoj golin e barazimit, kryesisht me gjuajtje nga distanca, por assesi nuk ia dilte të shënoj, dhe kështu pjesa e parë e takimit përfundoi në favor të Uruguait. Rastin më të mirë për të shënuar gol në këtë periudhë të lojës për Korenë e Jugut e pati Chu-Young Park, i cili me një goditje dënimi qëlloi shtyllën e portës së ekipit kundërshtar.

Jug-koreanët shumë furishëm e nisën pjesën e dytë, duke bërë përpjekje të mëdha për ta barazuar rezultatin. Pas disa rasteve të mira shënimi, përkatësisht në minutën e 68-të, Koreja e Jugut ia doli ta barazoj rezultatin në 1:1 nëpërmjet Chung-Yong Lee, i cili realizoi gol me kokë, pasi mbrojtja e Uruguait nuk ishte në nivel të detyrës.

Kur u shkri epërsia që e kishte, Uruguai sërish filloi ta kërkoj golin e fitores, të cilin e shënoi në minutën e 80-të, për rezultat përfundimtar, 2:1. Realizues sërish ishte Suarez, i cili gol ishte mjaftë i bukur. I njëjti futbollist, para se ta shënonte këtë gol, i pati edhe dy-tri shanse mjaftë të mira për shënim.

Kjo është hera e parë që Uruguai u kualifikua në çerekfinale të një Kampionati botëror, që prej vitit të largët 1970.