Robinho: Gabova që u largova nga Reali

nga **Binni** Sun 5 Sep 2010 - 5:55

Supersulmuesi i Milanit, Robinho, ka folur për arsyet e dështimit të tij te Manchester City, të cilët për brazilianin pos që ishin nga ana sportive, kishin lidhje edhe me jetën private të ish-sulmuesit të Real Madridit.

“As Mark Huhges e as Roberto Mancini nuk më kuptuan. Ndoshta ata kanë besuar vetëm në gjërat sportive, por kjo nuk mjaftoi për mua. Ekzistoi mungesë kontakti mes lojtarëve dhe klubit. Ishte sikurse një zyre – të stërvitemi dhe mirupafshim, të luajmë dhe mirupafshim. Unë jam brazilian dhe unë nuk mund të ofroj paraqitjen më të mirë nëse nuk jam i lumtur në çdo aspekt të jetës”.

“Ky është problemi im. Unë jam futbollist i veçantë që ka nevojë të jetë i lumtur kur luan. Ky ishte rasti te Real Madridi, por kurrë te City. Ndoshta unë kurrë nuk është dashur të largohesha nga Real Madridi. Destinacioni im ishte Chelsea, por në momentin e fundit erdhi City dhe unë pranova. Unë nuk vendosa për transferin. Se çfarë bëjnë klubet është punë e tyre, por Huhges më telefonoi dhe këmbënguli që unë t’i bashkohem klubit. Ai ishte vendimtar”.

“Kur arrita te City, drejtorët e klubit më thanë se për disa vite ata do të tejkalojnë Unitedin, por koha kaloi dhe asgjë nuk ndryshoi. Mançesteri është vend sensacional për futboll, por vend i tmerrshëm për të jetuar…dimri, i ftohti dhe netët e errëta. Ishte e vështirë kjo për një brazilian të ri”.

“Liga Premier është një nga kampionatet më të mira në botë, pa dyshim. Stadiumet janë gjithnjë të mbushura dhe atmosfera është e mrekullueshme, por jo çdo futbollist është në gjendje të luaj në Angli. Karakteri mund të jetë i vështirë për një të huaj. Stadiumet më të mira janë Anfield Road dhe Old Trafford për shkak të historive, ndërsa kujtimi më i mirë do të më mbetet goli im i parë për Cityn dhe mënyra se si të gjithë ishin me mua, se si tifozët e Cityt më përkrahën”, deklaroi Robinho. /