Cana pranë largimit nga Galatasaray?

Marrëdhëniet mes superyllit kosovar, Lorik Cana dhe të trajnerit të Galatasarayt, Frank Rijkaard, janë përkeqësuar tej mase, pas një incidenti në sfidën ndaj Karabuksporit.

Millyet shkruan se ftohja e marrëdhënieve mes Canës dhe Rijkaard vjen pasi strategu holandez e zëvëndësoi mesfushorin defensiv kosovar vetëm pas 28 minutash lojë dhe kjo pas një gabimi të Canës në mesfushë, që lejoi skuadrën mysafire të dyfishonte epërsinë.

Nga ky gabim u nervozua tepër Rijkaard që menjëherë e largoi nga loja Canën, i cili nuk reagoi më butë dhe pa e shikuar fare trajnerin shkoi drejt e në zhveshtore.

Është një pikëpyetje e madhe e ardhmja e futbollistit kosovar në skuadrën turke, pasi që përkundër faktit se ai ka kontratë deri në vitin 2014 me gjigantin turk, marrëdhëniet jo të mira me trajnerin dhe mos aktivizimi i rregullt mund të bëjnë që Cana të kërkojë klub tjetër.

Loriku e zgjodhi Galatasarayn vetëm e vetëm që të jetë sa më pranë vendlindjes, ndërsa refuzoi një numër ofertash nga skuadra të mëdha evropiane, duke përfshirë këtu Arsenalin, Schalken dhe Bayernin. Galata e transferoi atë për 4.5 milionë euro nga Sunderlandi.