Shtrenjtohen nafta dhe cigaret

nga Vizitor Wed 5 Jan 2011 - 4:48

Viti i ri po fillon me një valë rritjesh cmimesh për konsumatorët, e cila ka prekur disa produkte njëherazi. Rritja ka përfshirë fillimisht cmimet e karburanteve.
Në tregun e brendshëm benzina po i afrohet nivelit 160 lekë, më i larti në dy vjet. Rritje ka patur edhe për naftën, e cila mesatarisht me 2 deri në 3 lekë për litër krahasuar me dy javë më parë.

Tregtarët thonë se janë disa faktorë që po sjellin rritjen e cmimeve të karburanteve në tregun e brendshëm. Së pari, cmimi i naftës në bursë ka kapërcyer nivelin 92.7 dollarë për fuci, vlera më e lartë në dy vitet e fundit.

Një tjetër faktor që sipas tregtarëve po sjell rritjen e cmimit të karburanteve në tregun e brendshëm është edhe forcimi i dollarit në raport me lekun.

Të dhënat zyrtare të Bankës së Shqipërisë tregojnë se krahasuar me një vit më parë, leku është zhvlerësuar ndaj dollarit me gati 10 për qind, një kosto kjo që tregtarët e ngarkojnë direkt tek konsumatorët.

Por një tjetër faktor që po rrit cmimet e karburanteve është edhe politika e taksave e ndjekur nga qeveria. Pak muaj më parë Ministria e Financave vendosi të rrisë taksat e karbonit, të cilat për benzinën u bënë nga 0.5 lekë në 1.5 lekë për litër, ndërsa për naftën nga 1 lek në tre lekë.

Vec karburanteve, rritje cmimesh ka patur edhe për cigaret. Në tregun me pakicë një paketë cigare aktualisht kushton nga 20 deri në 30 lekë më tepër.

Kjo rritje e cmimit të cigareve është pasojë direkte e politikës tatimore të qeverisë, e cila duke filluar që nga një janari rriti me 20 lekë për paketë akcizën e cigareve.