Egjipt, një vajzë merr emrin “Facebook”

nga **Katniss** Tue 22 Feb 2011 - 5:13

Facebook Jamal Ibrahim, ky është emri i një fëmije të lindur përpara disa orëve në Egjipt. Bëhet fjalë për një vajzë, që është e para në botë me një emër të tillë. Siç bën të ditur gazeta egjiptiane “Al-Ahram”,prindërit e saj kanë vendosur ta quajnë kështu, si mirënjohje për rrjetin shoqëror, që pati një rol themelor në revoltën popullore që solli rrëzimin e Mubarak.

Krijesa e Mark Zuckerberg, shpesh e konsideruar si humbje kohe, në Egjipt rezultoi e domosdoshme për organizimin e tubimeve, për qarkullimin e ideve, apo për të shpërndarë informacione të ndryshme në krahasim me ato të dhëna nga kanalet zyrtare.

Kështu, egjiptiani Gamal Ibrahim dhe e shoqja e tij vendosën që për të nderuar Facebookun e famshëm, t’i vendosë emrin e tij të bijës së sapolindur. Nëse kohë më parë, fëmijët merrnin emrin e protagonistëve të mëdhenj të historisë, sot historinë e bëjnë edhe format e reja të komunikimit, që shpesh ndihmojnë për ndryshimin e botës.

Facebook numëron pesë milionë e ca përdorues në Egjipt, teksa vetëm në dy javë pas 25 janarit janë krijuar më shumë se 32 mijë grupe dhe 14 mijë faqe, gjithmonë në lidhje me revolucionin që përgatitej aty.

www.strugasot.com