20 vjet, kalim nga diktatura e proletariatit, te e korrupsionit

Arben Rrozhani
Janë sërish bijtë e partisë së Punës. Janë sërish çunat e ish-Bllokut, që janë shpërndarë në të gjitha arteriet qeverisëse të vendit. Në Legjislativ, Ekzekutiv, Gjyqësor, parti politike, institucione të pavarura kushtetuese.
Të gjithë të lidhur familjarisht, ideologjikisht apo shpirtërisht me regjimin komunist, të cilit u shërbenin dhe ai ua shpërblente duke i shkolluar dhe duke i bërë pjesë të elitës së ardhshme të vendit.

Në krye të piramidës qëndron i vetëquajturi "antikomunisti më i egër" Sali Berisha, 67 vjeç, anëtar i devotshëm i PPSH-së prej vitit 1968, një vit pasi ishte diplomuar në Fakultetin e Mjekësisë në Tiranë. Partia e specializoi në degën kardiologji dhe e emëroi si asistent/profesor mjekësie në të njëjtin universitet dhe mjek kardiolog në spitalin e Përgjithshëm të Tiranës.

Në vitet '70, z.Berisha merret me punë kërkimore në fushën e kardiologjisë në Shqipëri dhe emërohet profesor kardiologjie në Universitetin e Tiranës. Në vitin 1978 bën studime të avancuara dhe trajnime në Paris. Në vitin 1989 iu dha titulli Profesor në Universitetin e Tiranës, ndërkohë që prej shumë vitesh ishte sekretar i partisë në organizatën e spitalit, duke drejtuar edhe ndëshkime mjekësh, siç ishte internimi i disa kolegëve nga Tirana për në Kavajë.

Në dhjetor të 1990-ës, kthehet urgjentisht nga Italia dhe ngarkohet nga presidenti i asaj kohe Ramiz Alia, që të ndërhyjë te studentët. Berisha shkoi dhe mbeti atje, derisa mori në dorë frenat e partisë së parë opozitare PD, pas të cilës u formuan edhe parti të tjera, ku u shpërndanë ish-anëtarët e PPSH-së.

PD-ja duhet të ishte bashkimi politik i të shtypurve nga regjimi komunist, por u kthye në çerdhen e komunistëve fanatikë me në krye Sali Berishën. Në propagandë Berisha ishte antikomunisti i flaktë, por në realitet ai përdori po ato metoda të regjimit komunist për të sunduar popullin, në mandatin e parë 1992-1997 dhe më pas në mandatin tjetër të nisur në 2005-ën, dhe për të mos e lëshuar këtë një muaj më parë qëlloi edhe mbi turmën, duke vrarë 4 njerëz, atë veprim që nuk guxoi ta bënte as Ramiz Alia 20 vite më parë, kur revolta popullore rrëzoi bustin e Enver Hoxhës.

Ndërsa kohë pas kohe dalin dokumente dhe lidhje të tij me ish-regjimin të cilit i shërbeu me aq përkushtim, ai nuk i ka fshehur këto lidhje përkundrazi. Pak muaj më parë, kur në media doli një fotografi, ku mjeku Sali Berisha shëtiste në një varkë në Liqenin e Pogradecit, apo rrinte pranë oxhakut në shoqërinë e djalit të ish-diktatorit Enver Hoxha, kryeministri i sotëm evokoi me pathos atë fotografi dhe kohën e shkuar si i përkëdheluri i bllokmenëve. Liljana Hoxha, nusja e djalit të vogël të Enver Hoxhës ishte shprehur se: "Atë vit ne ndodheshim me pushime në Pogradec.

Ky takim ku janë publikuar edhe fotot është për shkak të dy vjetorit të vajzës sime. Saliu është pritur për vite tek ne si mik i familjes. Deri para viteve '90, ne jemi takuar shpesh...".
Dihej botërisht atëherë se të ecje përpara në atë regjim obskurantist duhej të kishe besimin e partisë, të kishe dhënë prova besnikërie, dhe nëse ishe i përndjekur nga regjimi duhej të bëheshe bashkëpunëtor i sigurimit të shtetit, siç mendohet se janë shumica e atyre që aderuan në PD.

Sali Berisha ishte njëri prej të besuarve të partisë, sepse ajo e çoi edhe për specializim në Paris, kur shumë pak shqiptarë kishin fatin ta shikonin Parisin edhe në televizor bardh e zi. Si ai "Bijtë e partisë" nuk kanë munguar dhe ajo i rriti, i shkolloi dhe i bëri gati për brezin tjetër, që sot dy dekada pas rënies së bustit të Enver Hoxhës qeveris vendin dhe ka frenat e pushtetit.

Në fjalimet e veta patetike Berisha u drejtohet bllokmenë disa prej figurave të opozitës, por duke mos llogaritur se sa bllokmenë, çuna blloku dhe bij të partisë kanë përreth vetes. Në krye të qeverisë së ish-sekretarit të PPSH-së, Sali Berisha, janë deputetë dhe ministra pinjollët e ish-nomeklaturës komuniste që drejtuan vendin gjatë regjimit monist. Janë ish-zyrtarë të besuar të regjimit të shkuar, apo bijtë dhe nipat e tyre, që sot janë veshur deputetë, apo ministra në qeverinë e Sali Berishës. Emra të tillë si Genc Ruli, Genc Pollo, Ridvan Bode, Tritan Shehu, Sokol Olldashi, apo Jemin Gjana.

Bij të partisë dhe "çuna blloku" edhe në opozitë, e cila i ka trashëguar lidhjet familjare dhe shpirtërore me regjimin e kaluar. Në krye të opozitës shqiptare është Edi Rama nipi i ish-anëtarit të Byrosë Politike, Spiro Koleka, aleat i tij është Skënder Gjinushi, ish-ministër Arsimi i regjimit komunist. Rreth tyre janë deputetë apo zyrtarë vendorë, bij apo familjarë të ish-drejtuesve të regjimit të vjetër.

"Shekulli" ka sjellë disa prej emrave të deputetëve të PD-së dhe PS-së që kanë lidhje familjare dhe shpirtërore me regjimin e shkuar. Por këta janë vetëm disa ilustrime të faktit se në piramidën shtetërore të vendit, në postet kyçe janë "bijtë e partisë" dhe "çunat e bllokut"

***
"Bijtë e partisë" në PD
Ridvan Bode (52 vjeç) financier i lartë bujqësie, shef finance deri në 1990 dhe pedagog në Kamëz.

Rajmonda Bulku (53 vjeçe) aktore, ishte bashkëshorte te një pinjoll blloku komunist. Vjehrra e saj Eleni Pashko, ishte zv.ministre dhe anëtare e Byrosë Politike, ndërsa vjehrri Josif Pashko njëri prej bashkëpunëtorëve të ngushtë të Enver Hoxha.

Jemin Gjana (61 vjeç) ekonomist agrar prej vitit 1975.

Sokol Olldashi (39 vjeç) nipi i Dashnor Mamaqit, ish-kryeredaktor i ZP-së dhe më pas sekretar i Partisë së Tiranës, i shpallur armik nga regjimi i Hoxhës.

Genc Ruli (53 vjeç) drejtori i makina-importit në ministrinë e Tregtisë së Jashtme që në kohën e komunizmit.

Ilir Rusmajli (46 vjeç) djali i Çajup Rusmajlit, ish-drejtor i RTSH-së prej vitit 1976.
Tritan Shehu (62 vjeç) mjek në QSUT prej vitit 1975

Albana Vokshi (40 vjeçe) pinjolle e një familjeje të lidhur ngushtë me regjimin komunist. Bijë Vokshi, një e afërme e familjes kishte lëshuar shtëpinë e saj në Tiranë, për të bërë vend themelimi të Rinisë Komuniste në 1941.

Genc Pollo (48 vjeç) djali Stefanaq Pollos, historian dhe akademik i njohur i kohës së regjimit komunist

Ilir Bano (60 vjeç), inxhinier nafte dhe zyrtar në ministrinë e Burimeve Minerare dhe Energjetike në vitet 1991-1993.

Fatos Beja (63 vjeç), filolog, prej vitit 1971 redaktor në ATSH dhe më pas pedagog në Universitetin e Tiranës.

"Bllokmenët" e PS-së
Ditmir Bushati (34 vjeç) diplomuar për drejtësi. I ati Sulejman Bushati, ishte sekretar i parë i partisë në disa rrethe të vendit gjatë kohës së komunizmit si Kukës apo Lushnjë.

Namik Dokle (65 vjeç) prej vitit 1970 gazetar dhe drejtues në organet e PPSH-së. në 1989 sekretar i Sindikatave të Shqipërisë dhe më pas kryeredaktor i ZP-së.

Ilir Gjoni (49 vjeç) djali i ish-anëtarit të Byrosë Politike të PPSH-së.

Gramoz Ruçi (60 vjeç) prej vitit 1978 drejtues në organe partiake dhe shtetërore, ndërsa në vitin 1991 (shkurt-qershor) ishte ministër i Punëve të Brendshme.

Fatmir Xhafaj (52 vjeç) prej vitit 1982 jurist dhe gjyqtar si dhe funksionar në organizatat rinore dhe shoqërore.

Per"Shqip.dk"Shkodrani

sa keq per vendin tone whackbutt

njesoj esht si nga njera ane si nga ana tjeter;dikur njerezit vdisnin nga vrasjet qe bente enveri,ndersa sot njerezit po vdesin per mungese kushtet minimale te jeteses