Iraku tjetërqysh në “Perspectives”

Një seri fotografish e përthekuar në titullin “Perspectives” të fotografit amerikan Benjamin Lowy përjetëson një seri skenash reale e dramatike që sjelli një rrëfim krejt tjetër për Irakun dhe pasojat e tmerrshme që la aty lufta. Rrallë bën vaki që vetëm një foto mund të përcjellë një shumësi emocionesh, mesazhesh e domethëniesh që e bën të tepërt çdo shpjegim për të. Seria e fotografive “Perspectives” është pikërisht kjo. Ajo sjell një tregim në pamje të Irakut nën tymin e luftës. Lowy tash disa vjet - duke udhëtuar me ushtarët amerikanë me qasjen e tij të bujshme si fotograf dëshmon pasojat e luftës në Irak. Momentet më dramatike në disa rrugë të këtij vendi ai i përjetëson nga dritaret e vogla të xhipave ushtarakë, duke u bërë kështu i pavërejtur dhe i fshehtë. Ai thotë se qëllimi kryesor i serisë së tij fotografike është që amerikanëve dhe opinionit të gjerë t’ua sjellë një pamje tjetër të Irakut, e cila shpesh zhduket prapa xhirimeve të lajmeve, krejt të zakonshme.

Në fotografitë e tij, Lowy kastile i lë të dukshme kornizat e dritareve, dhe kësisoj determinohet autenticiteti i fotografive të tij e njëkohësisht lë një dozë metafore brenda tyre. Korniza e dritares është një barrierë e sojit të vet e cila shtyp dialogun.

Nëse irakianët e shohin përtej dritares ai nuk e di as vetë por është tepër i sigurt se personazhet e tij vërejnë bajagi mirë konvojet ushtarake që çojnë pluhur nëpër rrugët e vendeve të tyre. Disa ndalen për një çast dhe ua hapin sytë, i tallin apo brohorisin për ta por la të atillë që si bëjnë mall fare. Të fundit janë ata që e injorojnë praninë ushtarake duke këqyrur punët e tyre, ani pse situata në të cilën ndodhen ua zë frymën.

Pamje reale nga rrugët e Irakut janë tmerrësisht të rralla për opinionin amerikan. Ato zëvendësohen me pamje tjetër që personazh kanë ushtarët amerikanë. A i ndjejnë rrugët dhe irakianët edhe vetë ushtarët, Lowy nuk ka përgjigje për këtë por me projektin e tij ai vazhdon të provokojë opinionin i cili vazhdon të shtrojë këso pyetjesh dhe të ngjashme.