Krenare Rugova vjen me sfilatë të re

Dizenjatorja e modës Krenare Rugova më 3 dhjetor do të organizojë një sfilitë mode ku do t’i prezantojë kreacionet më të reja të saj. Sfilata do të mbahet në hollin e Bibliotekës Kombëtare dhe dizenjatorja kosovare do të prezantojë koleksionin më të ri të edicionit pranverë/verë 2012. Krenare Rugova kësaj here vjen me një përmbledhje të re të kreacioneve të saj, që shquhen për inkorporimin e dizajneve autokotone dekorative me argjend dhe bakër. Përfshirja e elementeve të ndryshme dekorative të punës së dorës, të traditës së pasur të filigranit në Kosovë, është pjesë e angazhimit të saj për vendosjen e një baraspeshe të sofistikuar mes tradicionales dhe modernes. Ky është prezantimi i dytë me radhë i markës së modës “KR”, tashmë i njohur jo vetëm në Kosovë, por edhe jashtë. Krenare Rugova më herët ka organizuar edhe një sfilatë tjetër jo të zakonshme në sheshin/amfiteatrin e bustit të Gjergj Kastriotit-Skënderbeut në Prishtinë.