Vetëvaret Ardian Klosi, mesazhi i fundit për gruan: Nuk mundem më!

TIRANE - Publicisti i njohur Ardian Klosi i ka dhënë dje fund jetës në moshën 55-vjeçare, duke u vetëvarur. Në orët e vona të natës Klosi është gjetur i vdekur në shtëpinë e tij.
Pavarësisht ndihmës së parë që i është dhënë nga bashkëshortja e tij gjermane, Jutta Benzenberg, ai nuk ka dhënë më shenja jete dhe për këtë arsye ajo ka lajmëruar policinë. Në vendin e ngjarjes kanë shkuar forcat e Komisariatit nr.1, të cilët kanë bërë këqyrjen e vendit të ngjarjes.Ndërsa trupi i pajetë i Ardian Klosit u transportua në Institutin e Mjekësisë Ligjore, ku do kryhet autopsia,sic raporton Gazeta Shqiptare.

Policia tha se ka pyetur paraprakisht bashkëshorten e Klosit, me të cilën ai ka edhe dy vajza 18 dhe 16-vjeçare, e cila ka deklaruar se i shoqi i kishte lënë një mesazh në celular para se të merrte vendimin fatal. Siç mësohet nga burime të policisë , teksti i mesazhit është ende i pazbardhur.

Rreth katër muaj më parë, në janar të këtij viti Ardian Klosi, tentoi vetëvrasjen me një grusht ilaçesh qetësuese. Në këtë kohë ai u shtrua në spitalin Neurologjik dhe pas masave paraprake të marra nga mjekët, ai u shtrua në Psikiatrik, pasi gjendja e tij ishte ende e pastabilizuar.

MOTRA: HUMBJA E MADHE, JETA E ARDIANIT E MBUSHUR ME EMOCIONE
Motra dhe bashkëshortja gjermane e të ndjerit i kanë pritur ngushëllimet në shtëpinë e prindërve të Ardianit. Në një prononcim për News 24, motra e tij rrëfen dhimbjen për humbjen e vëllait, ndërsa e përshkruan jetën e tij të mbushur me emocione e veprimtari.

“Intelektual i rrallë, me një zemër shumë fisnike dhe të gjerë, një punëtor i palodhur, një njeri modest me cilësitë më të mira njerëzore...Ç’rëndësi ka, jeta e tij mbaroi, një jetë e mbushur me shumë emocione, me shumë veprimtari. Për ne ishte një humbje shumë e madhe, e kishim shpirt e zemër. Ardiani ishte shumë i qetë, ne nuk kuptuam asgjë”, rrëfen ajo.

TIMO FLLOKO: BISEDA E FUNDIT ME KLOSIN, TË MËDHENJTË NUK GJYKOHEN
Aktori i njohur Timo Flloko ka qënë personi i fundit i cili ka qëndruar me ardianin disa minuta para se ai të vetëvritjej. Ai rrëfeu për News 24 bisedën me të ndjerin. “Folëm për Brehtin, të cilin donte ta ribënte në maj, folëm për Faustin, për tema aktuale sic është zgjedhja e presidentit. Folëm rreth 15 minuta, ishte një bisedë shumë e ngrohtë, por nuk munda të konstatj në asnjë moment, ndonjë melankoli apo trishtim në sytë e tij”, rrëfen Flloko.

Artisti ka shpjeguar edhe thelbin e mesazhit që publicisti Klosi i la bashkëshortes. “Kaluam shumë bukur, por unë nuk mund të vazhdoj më, kur të kthehesh eja pa vajzën...”

Flloko u shpreh më tej se “Ai ishte një intelektual i klasit të parë, elitist, përkthyes i rangut të parë, një personalitet shumë dimensional. Gjej rastin ta them këtu, se si i madh që qe ai bëri një zgjidhje dhe të mëdhenjtë nuk gjykohen”, shtoi ai.

VEPRIMTARIA
Ardian Klosi është një ndër publicistët e njohur shqiptar dhe ish-drejtues për një kohë të shkurtër i Radio-Televizionit Shqiptar. Ardian Klosi u lind në vitin 1957. U diplomua në fakultetin e Gjuhë - Letërsisë në 1981 dhe në vitin 1990 mori doktoratën. Nga viti 1993 - 1998 ka qëndruar në Gjermani. Ai ka botuar disa libra si në shqip, ashtu edhe në gjermanisht. Në shqip atij i njihen këto botime: 1991: “Refleksione” (me Edi Ramën), 1991: “Shqipëria zgjim i dhunshëm”, 1993: “Quo vadis Shqipëri”, 1997: “Shqipëria ç’mund të jetë” dhe në gjermanisht: 1993: “Mbijetesë shqiptare” (fotot Jutta Benzenberg), 1997: “Fjalor gjermanisht-shqip” (me W. Fiedler), si dhe mjaft tregime, ese, artikuj në shtypin shqiptar dhe të huaj. Ai është i martuar me fotografen e njohur gjermane Jutta Benzenberg me të cilën ka dhe fëmijë.

INTERVISTA
Gjatë një interviste për median e shkruar duke folur për veten e tij, Klosi thotë se atdheu për të janë shtëpia, rrugica dhe gjuha amtare. “Për mua njerëzit janë në thelb irracionalë. Ti gënjehesh nga fakti se janë të pajisur me arsye. Kanë nevojë për shumë vuajtje dhe shkatërrime që të vinë në udhë të drejtë. E keqja më e madhe është që njeriu është qenie egoiste, grabitqare. Kështu që gjithë kohën përpiqet të grabisë ose nga natyra ose nga shoqëria. Kjo sjell përplasje dhe katastrofa të pashmangshme”, shprehej Klosi. I pyetur nga gazetari Mustafa Nano nëse kishte frikë nga vdekja, Klosi u përgjigj: Aspak, vetëm se do doja të mos ishte e dhunshme. Të ikësh i qetë, me vetëdije e pa dhimbje duhet të jetë një bekim.

(er.nu/ma.ar/BalkanWeb)

me vjen shum keq;eh depresion i mallkuar i con njerezit ne vetvrasje