Ditëlindja, Edi Rama: Kam lindur në 4 korrik, jam proamerikan

TIRANË- Katër korriku ishte një ditë feste në Partinë Socialiste. Ashtu ka nisur qysh herët në mëngjes. Ndryshe nga ditët e tjera,
punonjësit
e PS-së, sekretarët e bashkëpunëtorët e afërt të Edi Ramës, veç
punëve të ditës menduan ta presin ndryshe kryetarin, që dje mbushi
fiks 48 vjeç. Kryefinancieri i PS-së, Gent Gazheli, së bashku me
bashkëpunëtorët e Ramës i dedikuan atij, një pritje në sallën, ku
zakonisht zhvillohen mbledhjet e grupit parlamentar. Një tortë e
thjeshtë dhe shishe shampanje ishin ato që shoqëruan festën e vogël,
që solli një atmosferë ndryshe në selinë e PS-së. Më herët se këto të
dyja, në parti kishin mbërritur tufa të shumta me lule, të cilave u
kishin paraprirë mesazhe të panumërta urimi nga simpatizantë, deputetë
të PS-së, drejtues vendorë të partisë, etj. "Asnjë mesazh urimi s'ka
mbërritur nga kryeministri Berisha, apo edhe ish-kryetari i PS-së, Fatos
Nano", - bëhet e ditur nga bashkëpunëtorët e Ramës.

Në festën e
vogël, në katin e dytë të PSsë, ishin të pranishëm të gjithë
sekretarët, të rinjtë e FRESSH-it, por jo kryetarja Elisa Spiropali. Një
shportë me një kompozim lulesh natyrale ishte dhurata që i bëri stafi,
kryetarit socialist. Por ndërkohë, buqeta më e veçantë dhe që u pëlqeu
të gjithëve ishte ajo e regjisorit Kiço Londo. Buqeta të tjera i kanë
ardhur Ramës edhe nga gazetarë, një prej të cilëve ishte ajo e dërguar
nga Alfred Peza. Por nuk kanë munguar edhe dhurata simbolike, njëra prej
të cilave ishte e anëtares së kryesisë dhe kryetare e njësisë nr.1,
Lindita Nikolla. Sapo ka parë këtë atmosferë në selinë e PSsë, Ramës i
është shtuar buzëqeshja dhe ka falenderuar bashkëpunëtorët e tij. Duke
ngritur gotat e shampanjës, Rama mësohet të ketë thënë se: "Në PS nuk
jam unë i vetmi që kam sot ditëlindjen. Dua t'i uroj këtë ditë edhe
Teutës (asistentja e kreut socialist). Ne socialistët e kemi të gjithë
ditëlindjen më 4 korrik, se jemi proamerikanë", -është shprehur Rama,
duke iu hapur rrugën më pas batutave të tjera në festën disaminutëshe,
por edhe duke sjellë në vëmendje 236-vjetorin e themelimit të SHBA-ve.
Kreu socialist uroi dje, edhe sekretarin organizativ, Blendi Klosi, për
lindjen e vajzës së tij. Të pranishëm në festë ishin edhe kryetari i
grupit parlamentar, Gramoz Ruçi, sekretarët, Ilir Beqaj, Armando
Subashi, Bashkim Fino, Erion Veliaj, Damian Gjiknuri, Arben Ahmetaj e
pothuaj i gjithë stafi i bashkëpunëtorëve në kabinetin e kryetarit të
PS-së, si dhe deputetë të ndryshëm. Pasi ka respektuar pritjen dhe
urimet që i kanë ardhur nga këta të fundit, Rama ka lënë selinë e PS-së,
për të vijuar më pas me një festë private, në familjen e tij. Mësohet
se më pas, së bashku me bashkëshorten dhe të afërmit e tjerë, ditëlindja
e kreut të PS-së ka kaluar me një drekë familjare.
(e.m/GazetaShqiptare/BalkanWeb)

Hahaha edhe un jam proamerikane domethene

te gjithe dore korriku qenkemi