Maqedoni, vijojnë incidentet ndëretnike

Maqedonia është përfshirë sërish nga një incident ndëretnik, teksa këtë herë viktima të sulmeve brutale kanë përfunduar 4 adoleshentë 16-vjeçarë, banorë të fshatrave Lubin, Kopanicë dhe Bojanë të Shkupit.

Ngjarja ka ndodhur rreth orës 17:00 të ditës së premte, në lagjen Aerodrom të kryeqytetit maqedonas, ku të rinjtë shqiptarë janë sulmuar nga mbi 20 të rinj me kombësi maqedonase.

Sipas raportimeve, njëri prej adoleshentëve, që ra prè e dhunës brutale, është në gjendje të rëndë shëndetësore. Ky incident pason sulmet fizike e verbale të maqedonasve kundrejt shqiptarëve të Maqedonisë, menjëherë pas koreve të shumta anti-shqiptare në stadium, kur po luhej një ndeshje futbolli.

Maqedonia është përfshirë kohët e fundit nga protesta masive në vend, të udhëhequra nga opozita, pas miratimit të njëanshëm të buxhetit në Kuvend, nga qeveria e drejtuar nga kryeministri Gruevski.