Babë e bir rrahin dy policët rrugorë se u kërkuan dokumentet e makinës

Lushnjë- Dhuna e kontigjentëve të krimit ndaj efektivëve të policisë nuk ka të ndalur, duke u kërcënuar jetën në krye të detyrës. Dy policë të Qarkullimit Rrugor në Lushnjë, u plagosën pas një konflikti fizik me dy persona të tjerë, të cilët nuk pranuan kontrollin e dokumentacioneve të automjetit. Incidenti ndodhi pak ditë pas plagosjes së rëndë në operacion të shefit të krimeve të Burrelit, Musa Skura, i cili po lufton me vdekjen në spital. Ngjarja ndodhi afër mesnatës së martë, në rotondon e Savrës, në hyrje të autostradës Lushnjë-Fier.

Efektivët Berti Mema, 38 vjeç dhe Mariglen Lala, 30 vjeç, po mjekohen në spitalin e Lushnjës, por ndodhen jashtë rrezikut për jetën. Ata kanë marrë dëmtime në fytyrë, kokë dhe trup nga grushtet e agresorëve. Të dëmtuar lehtë mbetën edhe dy të dyshuarit për krimin, tashmë të arrestuar, babë e bir, Ylli dhe Laert Iljazi. Dy efektivët ishin në Patrullë dhe ndaluan një automjet me targa AA968CM, për kontroll. Aty ka nisur edhe debati midis dy palëve, i cili degjeneroi në sharje e në përleshje me gurë e mjete të forta rrethanore. Ndaj të ndaluarve rëndon akuza e “goditjes për shkak të detyrës”.



Burimi Informativ: Tirana Observer