Arsenalit po "i myken" paratë sherri i Wengerit

Kryetari i Arsenalit, Peter Hill-Wood thotë se skuadra ka para me bollëk për të bërë përforcime të mëdha në janar, mirëpo për përforcime nuk është i interesuar trajneri francez Arsene Wenger. Wenger ka besim te futbollistët e rinj që ka në skuadër. Ai beson se me këta mund të fitojë titullin e kampionit të Anglisë.
"Ne kemi shumë para për të harxhuar - nuk kemi buxhet të limituar. Unë kam biseduar me Arsene Wengerin para disa ditëve dhe ai më tha se nuk është i gatshëm të blejë futbollistë që nuk kanë aftësi dukshëm më të mëdha se futbollistët që ka në skuadër", ka thënë Hill-Woods për "Daily Star". Arsenal ka mungesa në sulm, pasi për shkak të lëndimeve, të paaftë për lojë janë Robin van Persie dhe Nicklas Bendtner. Mirëpo, Wengeri ka besim te futbollistët e tjerë që ka në dispozicion. Nëse është nevoja, ai do të fusë në ekipin e parë ndonjë lojtar nga akademia.
"Unë jam shumë optimist se kemi skuadër të mirë për të fituar titullin. Mund të ndodhë që Wenger të qëndrojë me këtë skuadër që ka", ka thënë Hill-Wood. Wenger është i njohur për politikën e tij të transferimit të futbollistëve të rinj. Ai nuk e ka shumë për qejfi të marrë lojtarë të shtrenjtë dhe të dëshmuar. Ai gjithnjë ndjek talentët, me pak para dhe i "gdhend" vetë.
"Unë shpresoj që kjo skuadër të mbetet së bashku edhe pesë vjet. Nëse ndodh kështu, ata do të dominojnë Evropën dhe Ligën e Anglisë. Në moshën 21 apo 22 fillon të bëhesh burrë. Kur je i ri është e vështirë të luftosh kundër burrave, mirëpo kur i bën vitet atëherë lufton me sukses. Njerëzit po harrojnë se kemi skuadrën me moshën mesatare 22-vjeçare. Ajo që po bëjnë këta futbollistë është fantastike. Unë jam i bindur se kjo skuadër ka potencialin të bëhet skuadra më e mirë që kam drejtuar ndonjëherë", ka thënë Wenger.
Arsenal nuk ka fituar titullin e Premier Leagues që nga viti 2005.