Leci kërkon të largohet nga Kavaja

Mbrojtësi kosovar Liridon Leci pritet të ndërrojë mjedis gjatë afatit të janarit. Ai ka kërkuar që të largohet nga skuadra e Besës së Kavajës, me të cilën ka kontratë deri në qershor të vitit 2010. Kërkesën për largim ia ka paraqitur presidentit të klubit Nexhat Bizhdili.
"Nuk jam i kënaqur me trajnerin dhe kjo është arsyeja e vetme pse dua të largohem. Jam aktivizuar në të gjitha ndeshjet e stinorit vjeshtor, herë si startues e herë si zëvendësues. Por asnjëherë nuk jam aktivizuar në pozitën time, atë të mbrojtësit të majtë. Trajneri më ka aktivizuar në mesfushë dhe sulm, pozita që nuk më përshtaten", ka thënë Leci të shtunën për gazetën. "Presidenti i klubit nuk dëshiron të më lirojë. Megjithatë, unë jam i vendosur dhe i kam thënë se me këtë trajner nuk rri më. Kam oferta nga Dinamo e Tiranës dhe Vllaznia e Shkodrës".
24-vjeçari në Kavajë u transferua dy vjet e gjysmë më parë. Në Shqipëri ka luajtur edhe për Elbasanin dhe Flamurtarin.
Leci nuk është kosovari i vetëm në këtë ligë që pritet të lëvizë në janar. Mediumet tiranase të shtunën kanë shkruar se Vllaznia e Shkodrës do të lirojë mbrojtësin Blerim Rrustemi, pasi janë të pakënaqur me të.