Robben kishte ndjekur me thikë hajdutët

nga Li12i-GG ARMY Fri 26 Feb 2010 - 23:58

Munchen, 27 shkurt - Mesfushori holandez i Bayern Munchenit, Arjen Robben është i njohur si futbollist kualitativ dhe i rrezikshëm. Por, Robben është i rrezikshëm edhe jashtë fushës së blertë. Këtë e kanë përjetuar tre hajdutë që kishin hyrë në shtëpinë e Robbenit në Madrid, vitin e kaluar. Holandezi në vend se të telefononte policinë, kishte marrë një thikë të madhe në kuzhinë dhe i kishte ndjekur hajdutët. Hajdutët më pas kishin kërcyer nga dritarja e katit më të lartë të shtëpisë së Robbenit.
"Kjo ka ndodhur vitin e kaluar. Unë mora një thikë dhe i ndjeka disa hajdutë. Ata u larguan të frikësuar nga shtëpia ime", ka thënë Robben përcjell të premten gazeta spanjolle "Marca".
Reali pas këtij sulmi ndaj shtëpisë së Robbenit kishte paguar shërbim të sigurisë për të ruajtur shtëpitë e të gjitha yjeve të skuadrës.
Robben në verë kaloi nga Reali në Bayern Munchen për 24 milionë euro dëmshpërblim. Holandezi këtë stinor po shkëlqen te skuadra "bavareze". Ai në Bundesligë ka shënuar tetë gola dhe ka asistuar pesë herë. Ka 15 paraqitje.
Robben në Gjermani ende nuk ka pasur probleme me hajdutë, mirëpo ai ka dhënë një mesazh kërcënues për ta.
"Në Gjermani le ta dinë të gjithë se me mua nuk ka shaka. Ky është një paralajmërim për hajdutët", ka thënë Robben.
Robben 26-vjeçar me Bayernin ka kontratë deri në verën e vitit 2013.
Futbollistët vazhdimisht janë pre të hajdutëve. Rastet më të shpeshta kanë ndodhur në qytetin anglez Liverpool, ku futbollistët e Liverpoolit dhe Evertonit ishin viktima.