Stuhi të fuqishme në brigjet e Evropës Perëndimore

nga Li12i-GG ARMY Sun 28 Feb 2010 - 0:05

Madrid, 28 shkurt - Erëra të fuqishme kanë goditur pjesë të Spanjës, Portugalisë dhe Francës ku rrezikojnë të shkaktojnë dëme të mëdha.
Ministri i Brendshëm spanjoll paralajmëroi njerëzit të shmangin udhëtimet me automobila e të qëndrojnë brenda shtëpive sa më shumë të munden. Stuhia pritet të mos zgjasë shumë, raportojnë agjencitë.
I prekur është edhe ishulli portugez i Madeiras, i cili ende nuk e ka marrë veten nga përmbytjet masive që morën dhjetëra jetë njerëzish javën e kaluar. Me insistimin e autoriteteve të mbrojtjes civile, e gjithë Portugalia është në gjendje alarmi të nivelit portokalli, i dyti në shkallen e rrezikut. Në rrugën e stuhisë ishin dhe ishujt Kanarie të Spanjës, veçanërisht La Palma, Gran Canaria dhe Tenerife, ku nuk ka dëme të mëdha.
Erëra me shpejtësi 160 km/h që do të thotë fuqi uragani, kërcënojnë edhe disa rajone të Francës. Autoriteti i aeroporteve në Spanje njoftoi se do të ketë të tjera vonesa apo anulime dhe këshilloi udhëtarët të kontaktojnë me kompanitë ajrore për të marrë informacion.