Nëna e 6 vjecares: Të na kthejnë vajzën

Pasditja e 22 majit shënon kohën e ndarjes së vogëlushes 6 vjecare Bleona Mataj nga prindërit, Bukurija dhe Zamiri, si dhe nga vëllai i saj i vogël 3 vjecar.


Kanë kaluar mëse 13 ditë nga koha e zhdukjes dhe në shtëpinë e vajzës ka ende shumë shpresë. Vajza humbi cdo gjurmë 500 metra larg banesës së saj.

Ngjarja detyroi drejtuesit e lartë të Policisë së Shtetit për të shkuar në Kukës, ndërsa hetimi po ndiqet nga Prokuroria e Krimeve të Rënda. 3 milionë lekë shpërblim janë vendosur për atë që jep informacione për vajzën.

Pistat për zhdukjen janë të shumta dhe nisin nga një sulm i kafshëve të egra, humbje në pyll, grabitje për shkak të ndonjë konflikti.

Në listën e të pyeturve nga policia janë edhe të afërmit e vajzës, por hetimet nuk kanë dhënë asnjë rezultat.

“Ai person që e ka të mos ma dëmtojë fëmijen, le të hapë gojën për cdo gjë që do por të ma lirojë vajzën, ta lërë në një rrugë ku ta gjejmë. Do t’i japim cfarë kërkon dhe nuk do ta denoncojmë në polici. Por duam Bleonën pasi ajo është jeta jonë”, shprehet nëna e vajzës, Bukurie Mata.

Ndërkohë, në zonën e Zapodit vazhdojnë kërkimet për të cilat është kërkuar edhe ndihma e policisë së Kosovës dhe Maqedonisë.