Tailandezët vendin e parë për dizajnim softueri, studentët nga Serbia nën-kampion

Gara vjetore “Imagine Cup” u organizua nga Microsoft
këtë vit në Varshavë, Poloni. Vendin e parë e ka fituar ekipi “Skeek” nga
Tailanda, në garë kanë marrë pjesë 66 ekipe, derisa në fazat paraprake të garës
kanë marrë pjesë 325,000 studentë nga e gjithë bota.

Studentët e Fakultetit Teknik “Mihajlo Pupin” nga Zrenjanini i Serbisë janë
zgjedhur nën kampion bote në dizajnimin e softuerit. Katër studentë nga ky
fakultet kanë marrë pjesë në garë me projektin “Neural Communicatior” i cili i
mundëson njerëzve me paralizë të rëndë të komunikojnë me botën e jashtme përmes
pajisjeve komerciale, me të cilin projekt kanë mahnitur gjyqtarët nga të gjitha
kontinentet.

“Inspirimi për këtë projekt ka qenë një i ri i paralizuar të cilin në
spital e kanë vizituar mjekët dhe e vetmja mënyrë komunikimi ka qenë me
përgjigje po dhe jo. Ne kemi ardhur me idenë që të krijojmë mundësi për njerëzit
me nevoja të veçanta në mënyrë normale të komunikojnë me të gjithë dhe përmes
kësaj pajisje të përdorin të gjitha opsionet në kompjuter” deklaroi Vanja
Zavishin, pjestare e grupit TFRZ Team.

Ekipi ishte përkrahur nga Ministria për Rini dhe Sport e Serbisë, Telekom
Srbija dhe Microsoft Serbia.

Regjistrimet për sezonin e gjashtë “Microsoft Imagine Cup” që do të
mbahet në SHBA kanë filluar, asgjë nuk ju ndal të konkurroni nëse keni aftësi
për Dizajnim Softueri, Dizajnim Lojërash, IT Sfida, etj. Për më shumë detaje dhe
mundësinë e pjesëmarrjes vizitoni faqen zyrtare të kësaj gare: http://www.imaginecup.com/. Shpresojmë që
vitin e ardhshëm të kemi ndonjë përfaqësues nga vendi ynë në këtë event
botërorë./