Turqia çmonton Francën

Turqia ia ka bërë bajat basketbollin Francës dhe ndoshta edhe presidentit të Francës, Nicolas Sarkozy, pasi që ka mposhtur Les Bleus me rezultat të thellë 95-77, pranë një atmosfere fantastike në Sinan Erdem Dome.
Turqia krijimin e vizës për në BE e filloi në çerekun e parë, ku qartë u pa se kush do të dominojë në vazhdim. Çereku i dytë ishte fatal për francezët. Hidayet Turkoglu shfaqi formë fantastike për turqët, pasi që ishte në gjendje të realizonte prej çdo pozite, madje edhe nga hëna.

Nga ana tjetër, në pjesën e dytë Turqia vetëm sa i dha fund dilemës së fituesit, me Boris Diaw që tentoi i vetmuar të bënte diçka në këtë takim, një iniciativë që u tregua e kotë.

Më i miri në ndeshje dhe në anën e francezëve ishte Boris Diaw me 21 pikë, 5 kërcime dhe 4 asistime, ndërsa tek turqët u dallua kush tjetër pos Hidayet Turkoglut me 20 pikë dhe 3 asistime.

Në çerekfinale Turqia do të takohet me Slloveninë, kurse në rast të kualifikimit në gjysmëfinale, do të ketë punë me fituesin e takimit tjetër çerekfinal, Serbi-Spanjë.