Strasburgu të hetojë tragjedinë e Gërdecit

Gjykata e Strasburgut ka pranuar kërkesën e dy të plagosurve në tragjedinë e Gërdecit për gjykimin e Fatmir Mediut, ministër i Mbrojtjes në kohën e shpërthimit dhe aktualisht kreu i Mjedisit.

Lajmi është bërë i ditur përmes një njoftimi të shpërndarë nga studioja ligjore që mbron interesat e familjarëve të viktimave të tragjedisë, që mori 26 jetë njerëzish dhe la të gjymtuar 300 të tjerë- njofton Shekulli.

Sipas njoftimit, Gjykata e Lartë pasi mori në shqyrtim aplikimin e bërë nga dy të dëmtuarit, R. Durdaj dhe A. Hazizaj, e vlerësoi të mjaftueshëm dhe të qenësishëm për të hetuar më tej në këtë proces.

Sipas kryetarit të shoqatës së Familjarëve të Viktimave, Feruzan Durdaj, banorët e Gërdecit e përshëndesin këtë hap pozitiv dhe vazhdojnë të besojnë ende te drejtësia.