Kuzhe kërkon të qëndrojë në stol kundër Bosnjës

Prishtinë, 3 tetor - Përzgjedhësi i Shqipërisë, Josip Kuzhe, ka kërkuar që të drejtojë kombëtaren në ndeshje kundër Bosnjë-Hercegovinës. Kuzhe një kërkesë të tillë e ka paraqitur të shtunën, vetëm dy ditë pasi pësoi hemorragji cerebrale. Trajneri kroat është i shtrirë në spitalin amerikan në Tiranë.
Kërkesën për të drejtuar kombëtaren në ndeshjen e tetë tetorit Kuzhe ia ka parashtruar mjekut Fatos Olldashi. Olldashi ka thënë se gjendja shëndetësore e Kuzhes është më e mirë.
"Josip Kuzhe më ka thënë se dëshiron që të jetë në stadium për të drejtuar kombëtaren kundër Bosnjës. Unë i kam thënë se një gjë e tillë nuk ka mundësi të ndodhë. Madje i kam rekomanduar atij që edhe në televizion mos të shikojë takimin", ka thënë Olldashi.
Mediumet tiranase kanë njoftuar që Kuzhe është pezmatuar me përgjigjen e mjekut dhe ka kërkuar që drejtuesit e FSHF-së të bëjnë ndonjë lëvizje për të bindur mjekun, por kjo ishte e pamundur. Shefi i repartit të neurologjisë, Olldashi, ka thënë se me paraqitje në stadium Kuzhe do të rrezikonte jetën.
Ndërkohë Federata Shqiptare e Futbollit ka vendosur që kombëtaren në dy ndeshjet e ardhshme ta drejtojnë ndihmësi i parë i Kuzhes, boshnjaku Xhemal Mustdanagiq dhe Astrit Maçi. Maçi aktualisht është shef i sektorit të licencimeve në FSHF. Ai më herët ka drejtuar skuadrën e Laçit. Maçi flet rrjedhshëm gjuhën kroate dhe për këtë arsye është vendosur të qëndrojë në krah të Mustedanagiqit.
"Është vendosur që kombëtaren në dy ndeshjet e radhës ta drejtojë Xhemal Mustedanagiq, ndërsa pranë tij do të jetë drejtori teknik i Federatës, Astrit Maçi. Pas këtyre dy ndeshjeve do të shikojmë gjendjen shëndetësore të përzgjedhësit Kuzhe dhe do të marrim një vendim", ka thënë për gazetën zëdhënësi i FSHF-së, Tritan Kokona.
Ndërkohë mediumet tiranase kanë njoftuar se drejtuesit e FSHF-së kanë kontaktuar edhe ish-përzgjedhësin Oto Bariq dhe kanë kërkuar nga ai që të marrë drejtimin e kombëtares në dy ndeshjet e radhës. Por Bariq ka refuzuar me arsyetim se nuk njeh fare skuadrën.
Ndërkohë zëdhënësi Kokona ka hedhur poshtë mundësinë që FSHF-ja të ketë kontaktuar Bariqin.
Pas dy ndeshjeve të zhvilluara Shqipëria i prin grupit D të eliminatoreve për "Euro 2012" me katër pikë të mbledhura. Katër ditë pas ndeshjes me Bosnjën, "kuqezinjtë" takohen me Bjellorusinë në Minsk. Trajneri i Bosnjës, Safet Sushiq, ka thënë se futbollistët shqiptarë do të jenë shumë të motivuar në takimin e tetë tetorit, pasi do të kërkojnë që të fitojnë për përzgjedhësin e tyre.