Dyshohej për një pako-bombë. Kontroll godinës dhe postës ne Rome

Dyshohej për një pako-bombë. Kontroll godinës dhe postës
Alarm për bombë në Ambasadën Shqiptare në Itali. Një pako e dyshimtë është gjetur në godinën e selisë diplomatike nga personeli. Në vendngjarje kanë mbërritur forca të shumta policore dhe pas kontrollit gjithçka ka rezultuar e rremë. Në pakon që flitej se mund të kishte një bombë ishte vetëm një kalendar i vitit 2011. Kështu, alarmi është tërhequr, por autoritetet policore italiane po hetojnë për identifikimin e autorëve që kanë dërguar pakon. Selitë diplomatike në Romë janë sulmuar kohët e fundit nga këto pakot e dyshimta. Pas Greqisë, shpërthimet në ambasada kanë vijuar në Itali. Disa ditë më parë pakot-bombë shpërthyen në selitë diplomatike të Kilit dhe Zvicrës, ndërsa dje është gjetur një bombë në ambasadën greke në Romë. Fatmirësisht bomba nuk ka shpërthyer, pasi pakoja është harruar nga diplomatët grekë.

Mediat italiane shkruajnë se ambasadat janë vënë sërish në qendër të sulmeve terroriste. Pas shpërthimit në dy seli diplomatike, respektivisht të Kilit dhe Zvicrës më 23 nëntor, mëngjesin e djeshëm pakoja e dyshimtë është gjetur gati për të shpërthyer në ambasadën greke. Pakoja është gjetur nga një punonjës grek i ambasadës dhe për fat ajo nuk ka shpërthyer.

Pas kësaj ngjarjeje një mori telefonatash kanë mbërritur në Policinë e Romës nga selitë diplomatike të Venezuelës, Marokut, Kuvajtit, Principatës së Monakos, Suedisë, Danimarkës dhe Shqipërisë. Të gjitha informacionet dhe alarmet në këto ambasada kanë qenë false.

Ajo çka raportohet nga mediat italiane është se policia e vendit është në gatishmëri, sidomos në selitë diplomatike. Në lidhje me bombën e gjetur në ambasadën greke thuhet se ajo kishte mbërritur të premten, por askush nuk e kishte hapur. “Pamë diçka të dyshimtë dhe menjëherë lajmëruam policinë. Uniformat blu kanë mbërritur brenda tri minutash duke e neutralizuar”, tha ambasadori grek në Itali.

Forcat e policisë janë lajmëruar më pas nga ambasada e Venezuelës. Kanë hapur pakën e dyshimtë dhe kanë gjetur një kartolinë urimi. Alarmi në Ambasadën e Kuvajtit është dhënë nga disa punonjës të saj që kishte pikasur një pako të dyshimtë dhe pas kontrollit pakoja nuk kishte asnjë bombë.

Në orën 09:30, Ambasada e Suedisë ka dhënë alarmin dhe pas kontrollit ka rezultuar se pakoja kishte vetëm një korrespondencë normale të kësaj selie diplomatike. Ambasada e Principatës së Monakos ka vënë re një pako të vogël të dyshimtë. Pasi është hapur ka rezultuar se brenda saj ishte vetëm një libër. Në Ambasadën e Finlandës brenda pakos është gjetur një axhendë, ndërsa në ambasadën shqiptare, një kalendar.

Mar nga Gazeta Shqip