PS, demonstrata sot në katër qytete: Tiranë, Korçë, Lezhë e Vlorë

nga **WebMaster** Fri 4 Feb 2011 - 2:27

Deri tani nuk ka grumbullime. Ka vetëm policë qarkullimi. Do bllokohet rruga kryesore. Itinerari nga Pallati i Sportit deri në Sheshin e Flamurit. Do të zgjasë vetëm 50 minuta.
13:00 - Tiranë
Policia Rrugore ka filluar përgatitjet për të mos pasur probleme, sidomos me trafikun, i cili ka nisur të rëndohet pas mesditës.
12:00 - Elbasan
Autobusë me demonstrues janë nisur nga Elbasani, rreth 10. Shumica e njerëzve për shkak të largësisë mësohet që të jenë nisur me furgonë. Janë nisur rreth orës 10:00 - 10:15.
Zhvillohen sot demonstratat e Opozitës së Bashkuar në katër prej qyteteve kryesore të vendit. Prej disa ditësh, në të gjithë vendin janë shpërndarë drejtuesit dhe deputetët e PS-së, të cilët janë marrë me përgatitjen dhe organizimin e demonstratave në qytete. Demonstrata nuk do të fokusohet në kryeqytet, por edhe në tre qytete të tjera.
Në të katër qytetet do të jenë të pranishëm dhe banorë të zonave përreth, që do të mblidhen në hyrje të qyteteve ku do të organizohen marshimet, për t'iu drejtuar më pas qendrës së çdo zone.
Kryetari i Partisë Socialiste, Edi Rama, ndodhet sot në Vlorë, ku korrepondentja e "Shekulli"-t Anila Peçi raporton se marshimi i njerëzve do të zgjasë rreth 50 minuta nga Pallati i Sportit deri në Sheshin e Flamurit. Peçi raporton se Policia Rrugore po largon gjithë automjetet nga ky aks rrugor, ndërsa deri në orën 13:15 nuk kishin nisur ende grumbullimet e njerëzve.
Krahas drejtuesve të lartë të Opozitës së Bashkuar, në krye të protestave do të jenë dhe zyrtarë të lartë të Partisë Socialiste, si dhe deputetët e çdo zone. Deputetët kanë punuar prej disa ditësh në zonat e tyre që të marrin përkrahjen e banorëve për aksionin politik të opozitës. Secili qytet i Shqipërisë do të mbledhë qytetarë edhe nga zonat përreth. I gjithë veriu do të mblidhet në qytetin e Lezhës. Në Tiranë do të përqendrohen demonstrues së Shqipërisë së Mesme. Ndërsa në qytetin e Korçës do të jenë pjesë edhe banorë të ardhur nga zona e Juglindjes. Po kështu, në qytetin e Vlorës do të jenë pjesëmarrës qytetarë nga Jugu i Shqipërisë.
Demonstratat do të zhvillohen orën 14:00.