Tetovari që preku Hollywoodin

“Në atë kohë kisha një jetë përplot me plane dhe ide siç zakonisht kanë të rinjtë që ënde nuk e kanë gjetur thirrjen e tyre apo nuk janë orientuar drejtë profesionit të tyre të jetës. Ishte kohë e ëndërrimeve dhe unë po shijoja laramaninë e përjetimeve që kisha duke jetuar në mes Tetovës dhe Gjermanisë”, kujton ai duke shtuar se Tetova i ofroi atij gjithë atë çka ofron vendlindja kurse Gjermania ia dha atij horizontin më të gjerë për tu zhvilluar si aktor.
Gresa Kraja
Aktori që u bë i famshëm me filmin “Koha e Kometës”, Blerim Destani, rrëfen mbi jetën e tij para se të fillonte seriozisht të merret me aktrim dhe prodhim të filmave. Destani tregon për jetën e tij që e bënte dikur në Tetovë para se të bëhej protagonist i filmave evropianë dhe atyre amerikanë.
“Në atë kohë kisha një jetë përplot me plane dhe ide siç zakonisht kanë të rinjtë që ënde nuk e kanë gjetur thirrjen e tyre apo nuk janë orientuar drejtë profesionit të tyre të jetës. Ishte kohë e ëndërrimeve dhe unë po shijoja laramaninë e përjetimeve që kisha duke jetuar në mes Tetovës dhe Gjermanisë”, kujton ai duke shtuar se Tetova i ofroi atij gjithë atë çka ofron vendlindja kurse Gjermania ia dha atij horizontin më të gjerë për tu zhvilluar si aktor.
Blerim Destani përveç aktrimit që tashmë i është bërë profesion ka edhe hobi të tjera. Ai thotë se “Në moshë të re kisha pasion aktrimin, futbollin, veturat e shpejta dhe në përgjithësi gjërat e bukura. Tani aktrimin e kam profesion, ndërsa hobi e kam futbollin”.
Por kur koha nuk i premton që të marrë pjesë në ndonjë lojë futbolli ai me gjithë qejf e përcjell ndonjë ndeshje të rëndësishme. “Aktrimi më merr shumicën e kohës pasi është profesion që kërkon përkushtim të madh, ndërsa në kohën e lirë mundohem që sa më shumë të shijoj nga ato gjëra që i kam hobi dhe pasion”, pohon ai.
Por fama duke se nuk e ka ndryshuar atë dhe dashurinë që ai e ndjen ndaj Tetovës.
“Tetova është qyteti i fëmijërisë sime, dhe së këndejmi është edhe thellë në mua falë përjetimeve të fëmijërisë që janë edhe përjetimet më të fuqishme të çdo njeriu”, thotë Destani, duke shtuar se “jam i lidhur shumë, edhe pse kohëve të fundit nuk kam pasur edhe aq kohë që të jem fizikisht atje. Por përherë jam në njëfarë lidhjeje me miqtë e mi që jetojnë dhe asnjëherë nuk harroj të pyes se çfarë ka të re andej”.
Blerim Destani kujton herën e parë që ka luajtur në një film. “Eksperiencat e para ashtu siç zakonisht ndodh me eksperiencat e para karakterizoheshin me një pasion dhe përkushtim të pakufishëm dhe me mungesë njohurish për teknikat e xhirimeve. Gjithçka bëhej me pasion edhe pse mungonin shumë parakushte teknike”, rrëfen ai duke mos fshehur lumturinë që karriera e tij po i shënon ngritje të vazhdueshme. Destani ende e ruan pasionin e fillimit të karrierës. “Ndërsa sa u përket kushteve teknike të produkcioneve kam pasur privilegjin t’i njoh të gjitha, përfshi këtu edhe produksionet hollywoodiane”, pohon ai.
Destani gjithashtu pranon se për një aktor shqiptar, është mjaft e vështirë të depërtojë në skenën botërore. “Marrja e roleve është vetëm faza e parë, më pas pason faza e interpretimit para kamerës. Ajo që është karakteristikë e filmave evropian dhe hollywoodian janë përgatitjet. Në fazën përgatitore gjithçka, deri në detajet më të imta provohet, ndërsa vet faza e produksionit është e lehtë falë pikërisht përgatitjeve të mira”, thotë ai.
Destani i vullnetshëm dhe i dashuruar në profesionin e vet, parapëlqen zhanrin e komedisë, edhe pse edhe të tjerat zhanre nuk i lë anash. “Deri tani nuk kam luajtur vetëm në ‘science fiction’, më pëlqejnë të gjitha zhanret, me rëndësi është që filmi të ketë tregim universal dhe personazhi im të jetë shtyllë e rëndësishme në storien e filmit. Do të parapëlqeja më shumë të luaj në komedi, pasi ky është zhanri që më së paku e kam eksploruar. Dhe në komedi mendoj se mund të prezantohem shumë më ndryshe se sa më njeh publiku në rolet e deritanishme”, thotë ai.
Blerimi që tashmë ka aktruar përkrah yjeve hollywoodiane si Rhona Mitra, Robert Duvall, Bill Murray dhe Sissy Spacek, thotë se është një kënaqësi e pashpjegueshme “të kesh rastin të ndjekësh proceset e tyre përgatitore është një privilegj i madh. Ndërsa të këmbesh emocione para kamerës me Robert Duvall është një ëndërr e realizuar”.
Në të ardhmen ai ka dëshirë të bashkëpunojë me emra të tjerë të njohur të Hollywoodit.
“Çdo brez aktorësh e ka përfaqësuesin e vet më karakteristik. Nga aktorët e brezit të mesëm kam dëshirë të punoj me Sean Penn, shkaku është shumë i thjeshtë. Më pëlqen shumë mënyra se si ai i gdhend nga brenda personazhet që i interpreton”, tregon Destani dhe shton se “nga regjisorët do të pëlqeja shumë të punoja me Darren Aronofsky. Është regjisor shumë karismatik, më pëlqen këndvështrimi i tij si se i sheh fenomenet shoqërore. Ai edhe kur bën filma me produksione të mëdha e ruan estetikën e filmit të pavarur”.
Blerim Destani, edhe pse ka luajtur me shumë emra të njohur, ka dëshirë të vazhdojë të marrë pjesë në filma shqiptar apo filma me tematikë shqiptare. “Është e domosdoshme që sa më shumë producent të dëshmuar ndërkombëtar të qëndrojnë pas projekteve tona”, thotë ai. Për të ardhmen e afërt, Blerim Destani ka shumë plane.
Ai tregon se viteve të fundit ka bashkëpunuar me produksione evropiane, kurse në planet e afërta hyjnë edhe disa oferta nga filma amerikanë. Blerim Destani premton mjaft role cilësore në angazhimet e tij në të ardhmen. Deri tani ai ka interpretuar në filma si “Koha e Kometës”, “Dossier K”, “Get Low”, “The Berlin Project”, etj./Yllpress/StrugaSot

Ky ka lind ne Gjermani..por pjesen me te madhe te femijerise e ka kaluar ne Tetove.

Po,dhe me konkretisht,eshte nga nje fshat i Tetoves ,Bozovc

Me vjen mire qe ka arrit ne ate shkalle talenti,edhe suksese te kete.

Te pakten di shqip,edhe jo si ajo Dushku qe s'di nje fjale

suksese te metejshme................