Zjarret në Shkodër rrezikojnë banesat.

Zjarret në qarkun e Shkodrës vazhdojnë të jenë jashtë kontrollit. Korrespondentja e “Shekulli”-t në Shkodër, Anila Dushi, raporton se tre vatra zjarri në të majtë të rrugës që të çon në Shkodër, rrezikojnë seriozisht banesat.Tre mjete zjarrfikëse po përpiqen të shuajnë flakët ndërkohë që më e rrezikuar nga flakët është vila e ish-mbretit Zog e cila ndodhet në Shirokë.Mungesa e energjisë elektrike ka vështirësuar operacionin e forcave të policisë dhe zjarrfikësve ndërkohë që në ndihmë të tyre kanë ardhur dhe banorët e zonës..Ndërkohë vijon zjarri në malin e Taraboshit. Mjetet zjarrfikëse nuk kanë mundur të afrohen për shkak të terrenit të thyer. Zjarri ka përshkuar pisha e kullota në një gjatësi lineare rreth 5 km dhe gjerësi rreth 200 metra. Nga të dhënat paraprake janë djegur rreth 40 ha pyje e kullota dhe 13 banesa të pabanueshme në zonën e komunës Ana e Malit. Zjarri është shfaqur fillimisht në drejtim të varrezave të Shirokës dhe ka dalë në krahun tjetër të malit në Oblikë. Për orë të tëra është ndërprerë transmetimi i operatorëve radiotelevizivë në Shkodër që kanë antenat afër vatrës së zjarrit. Zjarri ka vazhduar dhe gjatë natës dhe vetëm pas orës 09:30 të së dielës ka pasur ulje të intensitetit të tij. Ndonëse në përmasa më të vogla, zjarri në Tarabosh vazhdon të jetë aktiv dhe retë e tymit dallohen qartë nga qyteti i Shkodrës.