Kufoma e groposur në Vlorë, një i kërkuar nga Policia

VLORE -Identifikohet kufoma, e cila u gjet pak ditë më parë në kodrat e fshatit Tragjas në rrethin e Vlorës. Burime zyrtare nga Drejtoria e Policisë së këtij qarku bënë me dije dje se personi që u gjet i groposur dhe me një litar pas qafe është Maringlen Tushaj, nga lagjia "Markat" e fshatit Llakatund..Mësohet se familja Tushaj kishte denoncuar zhdukjen e të afërmit të tyre që më 5 shtator. Menjëherë policia ka nisur kërkimet për gjetjen e të riut. Ishin dy barinj ata që gjetën trupin e pajetë të groposur në periferi të fshatit Tragjas. Sapo është gjetur kufoma, familjarët kanë dyshuar se bëhej fjalë pikërisht për të afërmin e tyre, nisur dhe nga një nishan në këmbën e majtë. Ndërkohë që familjarët e disa personave të tjerë të zhdukur kanë kërkuar që të bëheshin analizat e AND-së, për të saktësuar se kujt i përkiste trupi i pajetë. Pas mbërritjes së analizave ka rezultuar se bëhej fjalë për 25-vjeçarin nga Llakatundi. Burimet e mësipërme sqarojnë se viktima ka qenë person i shpallur në kërkim, pasi ishte dënuar me një vit burg nga Gjykata e Shkallës së Parë e Gjirokastrës për akuzën "dhënie ndihme për kalim të paligjshëm të kufirit". Gjithashtu, mësohet se prokuroria e Fierit kishte lëshuar urdhër-ndalimi ndaj Maringlen Tushajt për akuzën e "vjedhjes".

Burime pranë grupit hetimor thonë se i riu është dhunuar para se të vritej dhe se vrasja është bërë nëpërmjet mbytjes me litarin që iu gjet rreth qafës.

(d.b/GazetaShqiptare/BalkanWeb)