Pse kaq shumë gënjeshtra mediatike greke në dëm të shqiptarëve!?

Nga Arben LLALLA

Ka disa ditë që mediat greke elektronike dhe të shkruara po botojnë shkrime nxitësi midis grekëve dhe shqiptarëve. Një shkrim dashakeqës ishte se gjoja tre shqiptarë paskan grisur flamurin grek, për të cilën shumë pak gjasa ka që një akt i tillë i shëmtuar ta kryejë një emigrant shqiptar i cili jeton dhe punon në Greqi. Ky lajm për grisjen e flamurit grek u “zbulua” më 18 shtator, një ditë përpara gjykimit të togës ushtarake greke, të cilët më 25 mars 2010 gjatë paradës së pavarësisë së Greqisë hodhën parrulla raciste kundër shqiptarëve, turqve dhe maqedonasve. Pas këtij lajmi faqet e internetit morën zjarr dhe bënin thirrje që më 20 shtator të protestonin përpara Gjykatës së Pireut për mos dënimin e ushtarëve. Atë mëngjes përpara gjykatës dolën për të protestuar rreth 100 grekë, një numër simbolik që është për të ardhur keq në Greqinë 10 milionëshe dhe Athinën me 4 milionë banorë. Gjyqi u shty për më 16 dhjetor. (Në fillim të viteve 2000, në një fshat grek u gris flamuri i varur në ndërtesën e Komunës. Për këtë vepër u akuzuan emigrantët shqiptarë, por pas një muaji u zbulua se këtë akt poshtërimi e kishin bërë fëmijët e drejtuesve të komunës me qëllim përzënien e shqiptarëve nga fshati. Një burrë grek mbyti fëmijët e tij në një kanal dhe akuzoi shqiptarët. Pas dy ditëve u zbulua se ai vetë i kishte mbytur fëmijët e tij për xhelozi të ish-gruas sepse shkonte me mashkull tjetër. Kapiteni i një anije pasagjerësh copëtoi të fejuarën e tij, një top modele amerikane sepse e braktisi. Ai akuzoi shqiptarët për zhdukjen e të fejuarës, por pas disa muajsh hetim u zbulua që ai e kishte therur vetë të fejuarën. Ka me qindra raste që janë akuzuar dhe dënuar shqiptarët për vepra që nuk i kanë kryer, por askush nuk interesohet që drejtësia të vihet në vend.
Lajmi tjetër dizinformues dhe i gënjeshtërt u përhap me shpejtësi më 18 shtator se një polic grek nga Athina i transferuar në kufirin greko-shqiptar paska në krahun e tij të vizatuar flamurin kombëtar shqiptar. Ky lajm mori dhenë, i shoqëruar edhe me një foto ku fshihej një pjesë e fytyrës së një personi që ka një flamur shqiptar të vizatuar. Që të dy këto lajme nuk janë të besueshme sepse nuk ka fakte të vërteta, por vetëm akuza politike. Kjo është një metodë klasike për t’ju mbyllur gojën atyre që thonë dhe mbrojnë të vërtetën. Kush është në të vërtetë njeriu në foto me flamurin shqiptar? Ai është një djalë nga Drenaci i Komunës së Drenicës, i cili e ka vizatur flamurin në krahun e tij në fillim të viteve 2000, në moshën 20 vjeçare. Quhet Tahir Veliu dhe ka emigruar me familjen e tij në Kanada gjatë luftës së Kosovës në vitin 1999. Në vitin 2003 mu dha rasti ti bëj një intervistë rreth jetës së emigracionit në qytetin ku jeton.
Por kush i prodhoi dhe i përhapi këto lajme shpifëse!? Burimi fillestar i këtyre dy lajmeve janë faqet mediatike të internetit që komandohen nga grupet nacionaliste greke dhe të minoritarëve grekë nga Shqipëria. Që të gjithë u referohen faqeve të internetit VORIOEPIRIOT. Siç duket, për dëshpërimet politike të brendshme dhe të jashtme, grekët gjejnë ngushëllim tek lajmet gënjeshtra që prodhojnë duke akuzuar shqiptarët dhe Shqipërinë. Përfundimisht grekët njihen botërisht tashmë si mashtruesit më të mëdhenj të vërtetuar nga e mbarë bota pas zbulimeve të mashtrimeve ekonomike në miliarda euro. E tërë bota po tallet me falimentimin e shtetit që pretendon se shpiku dhe mbron demokracinë. Ndërsa minoritarët grekë, pas humbjes së Bollanos e kanë humbur rrugën e propagandës dashakeqëse për autonominë e Vorio-Epirit që duhet ta shpallin më 2014. Tashmë janë ndalur së funksionuari me dhjetëra faqe interneti, të cilat propagandonin politikën për aneksimin e jugut të Shqipërisë. Siç duket financuesi i tyre ka qenë ish-kryetari i Bashkisë së Himarës, Vasilis Bollanos